Sharada aldymen óńirdegi sport salasynyń ótken jylǵy damýy, sportshylardyń jetken jetistikteri týraly beinerolik kórsetilip, jeńisti joldary tanystyryldy. Jinalǵan qaýymǵa alǵashqy bolyp sóz arnaǵan oblys ákimi Amandyq Batalov sport salasyna kórsetilip otyrǵan qoldaýlar jaily qysqasha aityp, sportshylarǵa sheberlik, erik-jiger, kúsh-qairat tiledi:
– Qazirgi kezde barlyq jastaǵy azamattar arasynda buqaralyq sportty damytýǵa basa nazar aýdarylyp keledi. Biz árbir aýdan ortalyǵynda zamanaýi sport keshenderin salyp jatyrmyz. Ótken jyly Qarasai jáne Eskeldi aýdandarynda dene shynyqtyrý-saýyqtyrý keshenderi ashyldy. Jaqyn arada Kóksý aýdany Balpyq bi aýylyndaǵy sport kesheni ashýǵa daiyn. «Aýyl el - besigi» baǵdarlamasy boiynsha Balqash, Alakól, Uiǵyr, Aqsý, Raiymbek aýdandarynda 5 osyndai keshen salynyp jatyr. Bul jalpy turǵyndardy, jastardy buqaralyq sportqa, dene shynyqtyrýǵa kóptep tartýǵa múmkindik beredi. 2020 jyly oblysta sport salasyn damytýǵa 18,3 mlrd. teńge bóldik.
Jýyrda Taldyqorǵan qalasynda Orta Aziiada teńdesi joq Olimpiadalyq standartqa sai «Taldyqorǵan» ortalyq basseinin iske qosamyz. Munda balalarymyzdyń basseinde emin-erkin jattyǵýyna múmkindik týady. Bul ǵimaratta Álem chempionattaryn ótkizýge bolady. Sol siiaqty biz sport mektepterin ashyp, shtat berip, búgin arnaiy kólik satyp áperip otyrmyz. Materialdyq-tehnikalyq bazany jaqsartý sharalary sportshy jastardyń jaqsy nátijege jetýine yqpal etedi dep oilaimyn. Elimizdiń kók týy árqashan biikte jelbiresin. Isterińiz sátti bolyp, alǵa qoiǵan maqsat-murattaryńyzǵa jete berińizder, – degen A. Batalov.
Budan keiin oblys basshysy ári marapattaý rásimine kóship, úzdik sportshylarǵa Qurmet gramotasy men Alǵys hattaryn, arnaiy diplomdar jáne 300 myńnan 2 mln teńgege deiingi aqshalai sertifikattar tapsyrdy.
Marapat alǵandar qatarynda MMA sportynan QR halyqaralyq dárejedegi sport sheberi, 3 dúrkin Álem chempiony Ardaq Nazarov, kásipqoi boksshylar Janqosh Turarov pen Aidos Erbosynuly, tárbielenýshi sportshylary halyqaralyq jarystarda joǵary nátijelerge qol jetkizgeni úshin birqatar jattyqtyrýshylar – sadaq atýdan Nigmatýlla Saidiev, velosporttan Sanat Talaspaev pen Sábit Taimenkenov, áielder kúresinen Ádilet Ermakov, paýerliftingten Dáýren Elýbaev, shahmattan Qýanysh Jarqymbaev, sol siiaqty velosporttan QR-nyń 2020 jylǵy chempiony Baqytjan Bektenov, 10 jasqa deiingi jasóspirimder arasynda shahmattan ótken onlain Álem chempionatynyń kúmis júldegeri Elnaz Qaliahmet, indorhokkeiden áielder arasyndaǵy QR chempiony Viktoriia Lobanova, basketboldan aielder arasynda QR chempiony Diana Býshmelova jáne basqa da birqatar azamattarǵa qurmet kórsetildi.
Jiyn barysynda Ardaq Nazarov pen Viktoriia Lobanova sóz alyp, áriptesterin merekeli kúnmen quttyqtap, bolashaqta Jetisý óńirinen álem chempiondary kóptep shyǵýyna tilektestigin bildirdi.
Atap ótsek, tek ótken jyldyń qorytyndysy boiynsha oblys sportshylary barlyǵy 853 júldege ie bolǵan. Sonyń ishinde 292-si – altyn, 258-i – kúmis, 303-i – qola medal. Jyl ishinde 20 halyqaralyq sport sheberi, 124 sport sheberi, 375 sport sheberligine kandidat, 166 birinshi razriadty sportshy daiyndaldy. Óńir sportshylary Tokiodaǵy XXXII Jazǵy olimpiada oiyndaryna qatysýǵa 7 litsenziia utyp alǵan. Olardyń arasynda sadaq atýdan Sanjar Mýsaev, Denis Gankin, Ilfat Abdýllin, jeńil atletikadan Aiman Ratova, grek-rim kúresinen Ashat Dilmýhamedov, velosporttan Sergei Ponomarev, aýyr atletikadan Zýlfiia Chinshanlo bar.
