Búgin Almaty oblysynyń ákimshilik ortalyǵy Qonaev qalasyndaǵy mádeniet úiinde kásibi mereke – Ustazdar kúnine arnalǵan saltanatty shara ótti, dep habarlaidy Dalanews.kz.
Bul mereke 2023 jyldan bastap álemniń 100-den astam elinde atap ótiletin Dúniejúzilik muǵalimder kúnimen sáikestendirilip, 5 qazanda atalyp ótedi. 
Merekeniń basty maqsaty – ustazdardyń qoǵam damýyndaǵy rólin, olardyń eńbegi men bilim salasyna qosqan úlesin kórsetý. Sharaǵa 35 ardager ustaz, Abai atyndaǵy Qazaq ulttyq pedagogikalyq ýniversiteti, SDÝ ýniversiteti, Qazaq ulttyq qyzdar pedagogikalyq ýniversiteti, ál-Farabi atyndaǵy Qazaq ulttyq ýniversiteti jáne Qazaq ulttyq agrarlyq zertteý ýniversiteti siiaqty oqý oryndarynyń rektorlary, sondai-aq bilim salasyna eleýli úles qosqan qoǵam qairatkerleri qatysty.
Saltanatty shara bilim salasynyń damýy týraly beinerolikpen jáne Qonaev qalalyq balalar shyǵarmashylyq ortalyǵy oqýshylarynyń oryndaýyndaǵy "Ustazym meniń ustazym" ánimen ashyldy.
Oblys ákimi Marat Eleýsizuly Sultanǵaziev quttyqtaý sózinde bilim salasyn damytýǵa baǵyttalǵan aýqymdy jumystar men ózekti máselelerdiń sheshimine toqtaldy. Ol, atap aitqanda, "Jaily mektep" ulttyq jobasy aiasynda úsh aýysymdy bilim berýdi qysqartý maqsatynda, jańa oqý jylynda investorlardyń kómegimen 3 jańa mektep pen 5 orta bilim berý nysanynyń ashylǵanyn atap ótti.
Sondai-aq ol Memleket basshysynyń tapsyrmasyna sáikes Almaty oblysynyń eldi mekenderinde internetke sapaly qoljetimdilikti qamtamasyz etý úshin jol kartasy ázirlengenin basa aitty.
"Memleket basshysy óz sózinde bilimdi ult qana básekege qabiletti bola alatynyn birneshe ret atap ótti. Sondyqtan bilim berý men adami kapitaldy damytý memlekettik saiasattyń ózgermeitin basym baǵyty bolyp tabylady. Búgin memleket bilim berý sapasyn álemdik standarttarǵa sáikes kóterý úshin barlyq múmkindikterdi jasap jatyr", - dep atap ótti Marat Sultanǵaziev.
Shara barysynda bilim salasynyń úzdik ókilderi marapattaldy. "Úzdik synyp jetekshisi", "Úzdik aýyl mektebi", "Úzdik kásiptik bilim berý mekemesi" jáne "Úzdik balabaqsha" baiqaýlarynyń jeńimpazdary aqshalai syilyqtarǵa ie boldy. Talǵar aýdanyndaǵy №37 mekteptiń informatika pániniń muǵalimi Ainur Jabaeva "Jyldyń úzdik muǵalimi" ataǵy úshin avtokólik kiltimen marapattaldy.
Sonymen qatar, 89 adam Y.Altynsarin medalin, al 5 adam "Eńbek Ardageri" medalin aldy. 1173 muǵalim QR Bilim jáne ǵylym ministrliginiń Qurmet gramotasymen, 35 adam oblys ákimdiginiń Qurmet gramotalarymen jáne alǵys hattarymen marapattaldy. Sondai-aq, oblystyń bilim salasyna úles qosqan 8 investor "Aimaqqa eńbegi úshin" medalimen marapattalsa, 650 ustaz oblystyq bilim basqarmasynyń Qurmet gramotasyna ie boldy.
