Úleskerlerdiń úshin turǵyn úı máselesin sheshý - Almaty oblysy basshylyǵynyń únemi baqylaýynda turǵan másele bolatyn. Úleskerlerdiń qatysýymen qurylys júrgizý jumystaryna jaýapty Almaty oblysy ákimdiginiń ýákiletti organy bolyp tabylatyn «Jetisý Jańa Qurylys» JSHS-niń dırektory Núgirbek Abýlǵazınniń málimdeýinshe, búgingi kúni Almaty oblysynda úleskerlik qurylys máselesi tolyqtaı sheshildi.

Ózderińizge belgili, 2008-2009 jyldar aralyǵynda Almaty oblysynda 4129 úleskeri bar 21 problemalyq nysan bolatyn. 2009 jyly memlekettik qarjylandyrýdyń kómeginsiz 12 nysan boıynsha 1553 úleskerdiń máselesi sheshilgen bolatyn.

«Sonymen qatar, memlekettik qarjylyq qoldaýdyń arqasynda taǵy 34 keshenniń qurylysy aıaqtalyp, nátıjesinde taǵy 9 nysan boıynsha 2576 úleskerdiń máselesi sheshimin tapty. Bul maqsatqa búdjetten 34,588 mlrd. teńge bólingen bolatyn, onyń 34,009 mlrd. teńgesi respýblıkalyq búdjetten bólingen bolsa, 0,579 mlrd. teńge jergilikti búdjetten qarastyryldy. Osynyń arqasynda barlyq qajetti ınjenerlik júıeleri tartylǵan 355 myń sharshy metr jańa turǵyn úı boı kóterdi», - dep habarlaıdy Núgirbek Abýlǵazın.

N. Abýlǵazınniń habarlaýynsha, úleskerlerdiń máselesi boıynsha sońǵy nysan sanalatyn «Ómiruzaq» turǵyn úı kesheni boıynsha sońǵy qurylys jumystary aǵymdaǵy jyldyń tamyz aıynda aıaqtalǵan. Jalpy aýmaǵy 20,922 myń sharshy metr bolatyn 114 páterden turatyn 51 jeke turǵyn úı turǵyzyldy.  Nátıjesinde 105 úleskerdiń máselesi ońdy sheshimin tapty.

Osylaısha, búgingi kúni Almaty oblysynda úleskerlik qurylystyń problemalyq máseleleri tolyqtaı sheshildi.