Almaty oblysynda bir otbasy qylmystyq istiń tergelýine bailanysty alańdaýshylyq bildirip, memleket basshysyna júgindi. Ásem Abdýalievanyń aitýynsha, oqiǵa 2025 jylǵy 13 tamyzda turǵyn úi aýlasynda bolǵan. Onyń sózinshe, bir azamat jol qozǵalysy erejesin óreskel buzyp, balalardyń ómirine qaýip tóndirgen. Keiin týyndaǵan janjal kezinde onyń jubaiy jaraqat alǵan, dep habarlaidy Dalanews.kz.
Er adam kelesi kúni politsiiaǵa aryz túsirgen. Alaida arada birneshe ai ótse de, is boiynsha naqty nátijeler joq. Abdýalieva tergeý áreketteri tolyq júrgizilmei otyrǵanyn aitady. Onyń pikirinshe, is negizinen ekinshi taraptyń ýáji boiynsha qaralyp, jubaiyn kináli etip kórsetýge áreket jasalyp jatyr.
"Bastapqy quqyqqa qaishy áreket qarsy taraptan bastaldy. Soǵan qaramastan, bizdiń ýájimiz eskerilmei otyr", - deidi ol.
Turǵyndy alańdatqan taǵy bir jait – qarsy taraptyń buryn Ile aýdandyq politsiiasynda qyzmet atqarǵany. Is dál sol bólimshede qaralyp jatqandyqtan, ol tergeýdiń beitaraptyǵyna kúmán keltiredi.
Abdýalievanyń aitýynsha, is birneshe ret toqtatylyp, qaita qozǵalǵan. Biraq osy ýaqytqa deiin kýágerler tolyq suralmaǵan, beinebaqylaý jazbalary alynbaǵan, al sot-meditsinalyq saraptama qorytyndylary da jan-jaqty qarastyrylmaǵan. Sonymen qatar, onyń jubaiyna qysym kórsetilip jatqanyn da alǵa tartady.
"Tergeý nege sonsha uzaqqa sozylady? Nelikten istiń mán-jaiy tolyq ári ádil anyqtalmai otyr?" – deidi ol.
Onyń aitýynsha, jubaiy – úsh balanyń ákesi, otbasynyń asyraýshysy ári qart ata-anasynyń qamqorshysy. Sondyqtan istiń ádil qaralýy olardyń otbasy úshin asa mańyzdy.
Abdýalieva memleket basshysynan bul iske quzyrly organdardyń obektivti tekserý júrgizýin qamtamasyz etýdi surady. Ol tergeý barysynda zańdylyq pen beitaraptyq saqtalyp, qajet bolǵan jaǵdaida tiisti sharalar qabyldanýy tiis ekenin atap ótti.
Turǵyn bul másele azamattardyń quqyqtaryn qorǵaý jáne memlekettik organdarǵa degen senimdi saqtaý turǵysynan ádil sheshim tabýy qajet dep esepteidi.
