Almaty oblysynda bopsalaý jáne qaraqshylyq shabýyl jasady degen kúdikpen bir top adam ustalyp, ýaqytsha ustaý ızolátoryna qamaldy, dep habarlaıdy Dalanews.kz.

"Aldyn ala derekter boıynsha, 16–17 sáýirge qaraǵan túni Talǵar aýdanynda kúdiktiler aldyn ala josparlanǵan shema boıynsha 28 jastaǵy er adamdy adamdar az júretin jerge aldap shaqyrǵan. Keıin olar pyshaqpen qorqytyp, kúsh qoldaný arqyly jábirlenýshige dene jaraqatyn keltirip, ony taýly aımaqqa kúshtep alyp ketken", – dedi Almaty oblysy PD bastyǵy Meıram Ábikeev.

Qaskóıler jábirlenýshini quqyq qorǵaý organdaryna onyń tarapynan zańsyz áreketter jasaldy degen jalǵan aqparat taratamyz dep qorqytyp, 10 mıllıon teńge talap etken. Sondaı-aq quny shamamen 17 mıllıon teńge bolatyn avtokóligin kepil retinde alyp qoıǵan.

"Qazirgi ýaqytta sotqa deıingi tergep-tekserý amaldary júrgizilýde. Oqıǵanyń barlyq mán-jaıy anyqtalýda, sondaı-aq ustalǵandardyń ózge de osy tektes qylmystarǵa qatystylyǵy tekserilip jatyr", – dep tolyqtyrdy oblystyq PD bastyǵy, polısıa polkovnıgi Meıram Ábikeev.