Almaty oblysynyń ortalyǵy - Qonaev qalasynyń jergilikti turǵyndar, jastar, belsendiler men qoǵamdyq uıym ókilderiniń qatysýymen «Taza jaǵajaı» ekologıalyq aksıasy uıymdastyryldy, dep habarlaıdy Dalanews.kz

Aksıanyń maqsaty – jaǵajaı aımaǵyn tazartý, sý aıdyndarynyń lastanýynyń aldyn alý jáne qorshaǵan ortany qorǵaýǵa qoǵam nazaryn aýdarý.

«Bizdiń maqsatymyz - tabıǵatty taza ustaý jáne bolashaq urpaqqa mura etý. Ekologıanyń tazalyǵy men qorshaǵan ortany kútip ustaý – árbir azamattyń negizgi boryshyna aınalýy tıis. Osy oraıda, barsha turǵyndar birlesip, osyndaı sharalarǵa belsendi at salysý qajettiligin aıtyp ótken jón», - dedi shahar ardagerleri uıymynyń tóraǵasy Bazarbaı Oralbaev.

Aksıa barysynda qatysýshylarǵa qorshaǵan ortany qorǵaýdyń mańyzdylyǵy týraly aqparat berilip, ekologıalyq tárbıe jumystary júrgizildi.

Jalpy, atalmysh sharaǵa 200-den astam adam at salysyp, jaǵajaıdy turmystyq qaldyqtardan, plasık bótelkelerden, qaǵazdardan jáne basqa da qoqystardan tazalady. Nátıjesinde 3 tonnadan astam qoqys jınaldy.

Bundaı ekologıalyq sharalar aldaǵy ýaqytta da óz jalǵasyn tappaq.