Konferentsiiada baiandama jasaǵan partiia filialynyń tóraǵasy partiianyń Almaty oblystyq filialynyń jumysy, oblystyń damý baǵyttary Elbasynyń «Senim. Dialog.Bolashaqqa nyq qadam» – jańǵyrý baǵdarlamasy aiasynda jáne Qazaqstan Respýblikasynyń Prezidenti Q.Toqaevtyń sailaýaldy baǵdarlamasyna sáikes júrgizilip, ár salada úlken jetistikterge qol jetkizilgenin atap ótti.
Máselen, 2020 jyly oblysta «Jumyspen qamtýdyń jol kartasy» aiasynda 1051 jobany iske asyrýǵa 105,6 mlrd. teńge bólindi, 20,9 myń jumys orny quryldy. Onyń ishinde 982 nysan boiynsha tiisti jumystar aiaqtaldy. 2021 jyly jergilikti biýdjet esebinen 58 jobanyń aiaqtalýy josparlanǵan. Taldyqorǵan qalasynda 200 oryndyq juqpaly aýrýlar aýrýhanasy, 7 dárigerlik ambýlatoriia jáne 34 mektep salynyp, 4 aýrýhanaǵa kúrdeli jóndeý jumystary jasaldy. 220 eldi mekende 487,7 km joldary jóndeldi, 60 aýyldyń aýyz sý sapasy jaqsartyldy. Bul aýqymdy sharalar «Nur Otan» partiiasynyń «2021-2025 jyldarǵa arnalǵan Sailaýaldy baǵdarlamasynda» jalǵasyn tapty. Baǵdarlamany sapaly oryndaý maqsatynda, arnaiy Jol kartasynda 113 is-shara josparlanyp, 24 indikatorǵa qol jetkizý kózdelgen. Jalpy atalǵan sharalarǵa 2,6 trln. teńge qarastyrylǵan.
Sol siiaqty sailaýaldy baǵdarlamanyń «Ekonomikasy turaqty óńir» baǵyty boiynsha 51 joba iske asyrylady. Investitsiia kólemi – 778 mlrd. teńge, sonyń 5-eýi – Transulttyq kompaniialardyń qatysýymen júzege asyrylmaq.
«Aýyl turǵyndarynyń tabysyn arttyrý jáne azyq-túlik qaýipsizdigin qamtamasyz etý» baǵytynda basymdyq beriletin daqyldardyń alqabyn ulǵaitý jalǵasady. Irrigatsiialyq júielerdi qalpyna keltirý arqyly 67 myń gektar sýarmaly jer ainalymǵa engiziledi. Mal bordaqylaý alańdaryn, taýarly sút fermalaryn ashý, Qapshaǵaida jáne Eńbekshiqazaq aýdanynda kóterme-taratý ortalyqtaryn salý siiaqty sharalardyń arqasynda aýyl sharýashylyǵyndaǵy jalpy ónim kólemi 1,3 trln. teńgege jetip, eńbek ónimdiligi 2,5 esege artady.
- Qarabulaq aýylyndaǵy jáne Alakól aýdanyndaǵy qant zaýyttaryn qalpyna keltirýge talpynys jasap jatyrmyz. Ótken aptada men osy máselege bailanysty investorlarmen, atap aitqanda Halyq bankiniń ókilderimen sóilestim. Olar osy iske qarjy salýǵa ynta bildirip otyr. Qazir bul máselemen meniń orynbasarym Serik Turdaliev pen «Jetisý» áleýmettik kásipkerlik korporatsiiasy ainalysyp jatyr. Bul másele sheshilse, qant óndirý kólemin edáýir ulǵaita alamyz, - dedi A. Batalov.
«Kásipkerlikti damytý» boiynsha shaǵyn jáne orta biznestiń óńirlik jalpy ónimdegi úlesin 2025 jylǵa qarai 37,8% jetkizý kózdelgen. Osy mejege jetý úshin «Biznestiń jol kartasy», «Qarapaiym zattar ekonomikasy» baǵdarlamalary boiynsha 250 kásipkerge kómek kórsetilip, «Eńbek» baǵdarlamasy boiynsha 2 myńnan astam adamǵa mikrokreditter men granttar beriledi.
Al taza aýyz sý men ortalyqtandyrylǵan gazben qamtý maqsatynda Jol kartasynda sýmen qamtý, sý taratý nysandarynyń qurylysy, jaǵalaýdy bekitýge arnalǵan damba qorshaýlaryn ornatý jumystary qarastyrylyp, Aqsý, Sarqan, Alakól, Kegen jáne Raiymbek aýdandaryna qarai «Taldyqorǵan-Úsharal», «Shelek-Kegen» magistraldy gaz qubyry tartylady.
«Ómir súrý sapasyn arttyrý» sheńberinde 2021-2025 jyldary oblysta 5,4 mln. sharshy metr turǵyn úi salý josparlanǵan, sonyń ishinde 1 mln. sharshy metri «Nurly Jer» baǵdarlamasy boiynsha salynady. Sol siiaqty «7-20-25» jáne basqa da baǵdarlamalardyń úlesi zor.
Jol sapasyn jaqsartý da - sailaýaldy baǵdarlamanyń negizgi baǵyttarynyń biri. Bul baǵytta 4 myń shaqyrymnan astam jol jóndeýdiń barlyq túrimen qamtylyp, sonyń esebinen 118 aýyldyń joly jaqsarady. Sol siiaqty meditsinalyq qyzmet kórsetý, bilim berý salalaryn da jetildirý qarastyrylǵan.
- 2020 jyl bárimiz úshin úlken synaq boldy. Koronavirýs indeti kóp máselege basqasha kózben qaraýdy úiretti. Bul memlekettiń basty bailyǵy adam men onyń ómiri ekenin taǵy bir márte eske saldy. «Birgemiz» respýblikalyq aktsiiasynyń aiasynda 44 471 jetisýlyqqa 2,2 mlrd. teńgeniń kómegi kórsetildi. Munyń ishinde bóligi halyqtyń kómekke asa muqtaj 7 sanaty tolyq qamtyldy, - dedi A. Batalov.
Onyń aitýynsha, 2019-2020 jylǵy josparǵa sáikes oblys kóleminde partiianyń «Kedergisiz keleshek», «Ardagerlerdi ardaqtaiyq», «Baqytty otbasy» jáne «Jastar Otanǵa» jobalary aiasynda 1,2 mln. adamnyń qatysýymen 3 myńǵa jýyq is-shara uiymdastyryldy. Almaty oblystyq máslihat depýtattary, metsenattar, kásipkerler Rýslan Qojasbaev, Rimma Salyqova, Serik Aqsýbaev, Zakirjan Kýziev, Erik Aidarbaev, Asqar Súleimenov, Eldos Úshkempirov taǵy basqa depýtattar muqtaj otbasylaryna, kópbalaly analarǵa turǵyn-úi alyp berip, qaiyrymdylyq kómek kórsetip, aýyldyń damýyna óz úlesterin qosyp keledi.
Jiyn sońynda partiia filialynyń tóraǵasy 2021 jyldyń ekinshi jarty jyldyǵynda aýyldyq okrýg ákimderiniń sailaý ótetinin atap ótti. Sondai-aq partiia uiymy men músheleriniń aldyna Sailaýaldy baǵdarlamany iske asyrý jónindegi Jol kartasynda kózdelgen nysandardyń ýaqytyly jáne sapaly oryndaýdy, tapsyrdy.
