Almaty oblysynyń ortalyǵynda Ulystyń uly kúnin toilatý aǵash otyrǵyzý rásiminen bastaldy.
Rásimniń shymyldyǵy qariialardyń aq batasymen ashylyp, óńir basshysy Marat Sultanǵaziev jinalǵan jurtshylyqty merekemen quttyqtady. Oblys ákimi 1-shaǵyn aýdandaǵy 17-úidiń aýlasyna jasyl jelek egip, qazaqtyń 7 túrli dámi qoiylǵan dastarhannan aýyz tidi. Bul rásimnen keiin ortalyq alańda qalyń kórermen nazaryna kontserttik baǵdarlama usynyldy.
Budan bólek, oblys ákimi Marat Sultanǵaziev at basyn tiregen Qarasai aýdanynda dástúr, ulttyq qundylyqtar, sheber qoldar sekildi birneshe taqyryptarǵa arnalǵan qazaq úiler tigilgen.
Árqaisymen jeke tanysqan óńir basshysy kiiz úidiń birinde qaskeleńdik sábidiń tusaýyn kesti.
– Bul mereke adamdardyń ultyna, dinine qaramai biriktiretin meiram. Qarasai aýdany tarihy tereńde jatqan, kópultty aýdannyń biri. Búginde mereke osyndai deńgeide toilanyp jatqanyna qýanyshtymyn. Qurmetti jerlester, Ulystyń uly kúni qutty bolsyn! Aq mol, yrys-berekemiz turaqty bolsyn! – dedi Marat Sultanǵaziev óziniń quttyqtaý sózinde.
Al Jambyl aýdanynyń Kókbastaý atshabarynda ótken sharaǵa 12 myń kórermen jinaldy. Búgin munda 3 tonna baýyrsaq pisirilip, 2 000 litr naýryz kóje ishildi.
Bul jerde qazan-qazan naýryz kóje jasalǵannan bólek, tazy jarysy, Qunan jáne Alaman báige, kókpar ótti. 9 shaqyrymǵa shapqan qunandardan birinshi bolyp kelgen "Úmit" atty sáigúliktiń iesi mototsikl utty. Al 2-orynǵa "Shegirqasqa" taban tirese, 3-orynǵa Jambyl aýylynyń "Zýhra" sáigúligi ie boldy. Qunan báigede 25 sáigúlik ózara tartysqa tústi.
21 shaqyrymdyq Alamanda Rinat Ádilqas jattyqtyrǵan "Tasqara" basqalardan oq boiy ozyp keldi. 1-oryndy ielengenderge "Lada Granta" markaly avtokóliktiń kilti tabys etildi. 2-oryndy "Botagóz", 3-oryndy "Kózmonshaq" qanjyǵasyna bailady. Báigege 37 sáigúlik qatysty.
Ulttyq mereke men ulttyq oiyn ulyqtalǵan sharada oblys ákimi Jambyl aýdany turǵyndaryn Naýryz merekesimen quttyqtap, aqjarma tilegin arnady.
Jinalǵan qaýym da qushaqtasyp kórisip, bir-birine izgi sózderin aityp jatty.
– Ulys oń bolsyn, balalar! Qashanda Qazaqstannyń kók týynyń astynda yntymaqta, baq-berekede ómir súreiik! Densaýlyqtaryń myqty bolsyn! Búgingi ótip jatqan shara bárimizdiń kóńilimizden shyqty, – dedi óziniń pikirinde jambyldyq aqsaqal.
Sharaǵa Almaty oblysynyń ákimi arnaiy qatysyp, turǵyndardy Naýryz merekesimen jáne Mádeniet úiiniń ashylýymen quttyqtady.
Óńirdegi mádeniet basqarmasynyń basshysy Áliia Jaqypbekovanyń aitýynsha, nysan 260 oryndyq. Qazirgi tańda Mádeniet úiiniń qyzmetkerleri tolyq jasaqtalyp, jumys jasaýǵa ázir bolyp otyr.
Saltanatty ashylý rásiminde dúiim jurtqa aty máshhúr sýretshi Amandos Aqanaevtyń kórmesi uiymdastyryldy. Sondai-aq oblystyq Súiinbai atyndaǵy filarmoniiasy ánshileri, kúishi Seken Turysbekovtiń, "Aqjaýyn" orkestriniń kontserti ótti.
