الماتى وبلىسىنىڭ ورتالىعىندا ۇلىستىڭ ۇلى كۇنىن تويلاتۋ اعاش وتىرعىزۋ راسىمىنەن باستالدى.
ءراسىمنىڭ شىمىلدىعى قاريالاردىڭ اق باتاسىمەن اشىلىپ، ءوڭىر باسشىسى مارات سۇلتانعازييەۆ جينالعان جۇرتشىلىقتى مەرەكەمەن قۇتتىقتادى. وبلىس اكىمى 1-شاعىن اۋدانداعى 17ء-ۇيدىڭ اۋلاسىنا جاسىل جەلەك ەگىپ، قازاقتىڭ 7 ءتۇرلى ءدامى قويىلعان داستارحاننان اۋىز ءتيدى. بۇل راسىمنەن كەيىن ورتالىق الاڭدا قالىڭ كورەرمەن نازارىنا كونسەرتتىك باعدارلاما ۇسىنىلدى.
بۇدان بولەك، وبلىس اكىمى مارات سۇلتانعازييەۆ ات باسىن تىرەگەن قاراساي اۋدانىندا ءداستۇر، ۇلتتىق قۇندىلىقتار، شەبەر قولدار سەكىلدى بىرنەشە تاقىرىپتارعا ارنالعان قازاق ۇيلەر تىگىلگەن.
ارقايسىمەن جەكە تانىسقان ءوڭىر باسشىسى كيىز ءۇيدىڭ بىرىندە قاسكەلەڭدىك ءسابيدىڭ تۇساۋىن كەستى.
مەرەكەگە وراي ورتالىق الاڭعا جينالعان جۇرتتىڭ قاراسى دا كوپ بولدى. شارادا كۇمىس كومەي انشىلەر اسقاقتاتا ءان شىرقاپ، بيشىلەر مىڭ بۇرالا بي بيلەدى.
– بۇل مەرەكە ادامداردىڭ ۇلتىنا، دىنىنە قاراماي بىرىكتىرەتىن مەيرام. قاراساي اۋدانى تاريحى تەرەڭدە جاتقان، كوپۇلتتى اۋداننىڭ ءبىرى. بۇگىندە مەرەكە وسىنداي دەڭگەيدە تويلانىپ جاتقانىنا قۋانىشتىمىن. قۇرمەتتى جەرلەستەر، ۇلىستىڭ ۇلى كۇنى قۇتتى بولسىن! اق مول، ىرىس-بەرەكەمىز تۇراقتى بولسىن! – دەدى مارات سۇلتانعازييەۆ ءوزىنىڭ قۇتتىقتاۋ سوزىندە.
ال جامبىل اۋدانىنىڭ كوكباستاۋ اتشابارىندا وتكەن شاراعا 12 مىڭ كورەرمەن جينالدى. بۇگىن مۇندا 3 توننا باۋىرساق ءپىسىرىلىپ، 2 000 ليتر ناۋرىز كوجە ءىشىلدى.
بۇل جەردە قازان-قازان ناۋرىز كوجە جاسالعاننان بولەك، تازى جارىسى، قۇنان جانە الامان بايگە، كوكپار ءوتتى. 9 شاقىرىمعا شاپقان قۇنانداردان ءبىرىنشى بولىپ كەلگەن "ءۇمىت" اتتى سايگۇلىكتىڭ يەسى موتوسيكل ۇتتى. ال 2-ورىنعا "شەگىرقاسقا" تابان تىرەسە، 3-ورىنعا جامبىل اۋىلىنىڭ "زۋحرا" سايگۇلىگى يە بولدى. قۇنان بايگەدە 25 سايگۇلىك ءوزارا تارتىسقا ءتۇستى.
21 شاقىرىمدىق الاماندا رينات ءادىلقاس جاتتىقتىرعان "تاسقارا" باسقالاردان وق بويى وزىپ كەلدى. 1-ورىندى يەلەنگەندەرگە "لادا گرانتا" ماركالى اۆتوكولىكتىڭ كىلتى تابىس ەتىلدى. 2-ورىندى "بوتاگوز"، 3-ورىندى "كوزمونشاق" قانجىعاسىنا بايلادى. بايگەگە 37 سايگۇلىك قاتىستى.
ۇلتتىق مەرەكە مەن ۇلتتىق ويىن ۇلىقتالعان شارادا وبلىس اكىمى جامبىل اۋدانى تۇرعىندارىن ناۋرىز مەرەكەسىمەن قۇتتىقتاپ، اقجارما تىلەگىن ارنادى.
جينالعان قاۋىم دا قۇشاقتاسىپ كورىسىپ، بىر-بىرىنە ىزگى سوزدەرىن ايتىپ جاتتى.
– ۇلىس وڭ بولسىن، بالالار! قاشاندا قازاقستاننىڭ كوك تۋىنىڭ استىندا ىنتىماقتا، باق-بەرەكەدە ءومىر سۇرەيىك! دەنساۋلىقتارىڭ مىقتى بولسىن! بۇگىنگى ءوتىپ جاتقان شارا ءبارىمىزدىڭ كوڭىلىمىزدەن شىقتى، – دەدى ءوزىنىڭ پىكىرىندە جامبىلدىق اقساقال.
ال تالعار اۋدانى بەساعاش اۋىلىندا مادەنيەت ءۇيى قولدانىسقا بەرىلدى.
شاراعا الماتى وبلىسىنىڭ اكىمى ارنايى قاتىسىپ، تۇرعىنداردى ناۋرىز مەرەكەسىمەن جانە مادەنيەت ءۇيىنىڭ اشىلۋىمەن قۇتتىقتادى.
وڭىردەگى مادەنيەت باسقارماسىنىڭ باسشىسى ءاليا جاقىپبەكوۆانىڭ ايتۋىنشا، نىسان 260 ورىندىق. قازىرگى تاڭدا مادەنيەت ءۇيىنىڭ قىزمەتكەرلەرى تولىق جاساقتالىپ، جۇمىس جاساۋعا ءازىر بولىپ وتىر.
– بۇگىن ناۋرىز مەرەكەسىنە وراي نىساننىڭ حالىق يگىلىگىنە بەرىلگەنىنە كۋا بولىپ وتىرمىز. مۇندا ۆوكال، بي، تاعى باسقا ۇيىرمەلەر اشىلادى دەپ جوسپارلاپ وتىرمىز، – دەدى باسقارما باسشىسى.
سالتاناتتى اشىلۋ راسىمىندە ءدۇيىم جۇرتقا اتى ءماشھۇر سۋرەتشى اماندوس اقانايەۆتىڭ كورمەسى ۇيىمداستىرىلدى. سونداي-اق وبلىستىق ءسۇيىنباي اتىنداعى فيلارمونياسى انشىلەرى، كۇيشى سەكەن تۇرىسبەكوۆتىڭ، "اقجاۋىن" وركەسترىنىڭ كونسەرتى ءوتتى.
