Saltanatty shara Muqan Tólebaev atyndaǵy halyq aspaptar orkestri jáne «Sazgen», «Adyrna» folklorly-etnografiialyq ansamblderiniń qoiylymymen ashyldy. Budan soń oblys ákimi Amandyq Batalov oblystyq óner ujymdarynyń birlesken mádeniet maýsymynyń saltanatty ashylýymen quttyqtady.
– Mádeniet – ulttyń qýaty, ǵasyrlar boiy úzilmei kele jatqan rýhani bolmysy, aqyl-oi, parasaty. Tuńǵysh Prezidentimiz – Elbasy Nursultan Ábishuly Nazarbaev: «Mádeniet pen óner – qoǵam damýynyń negizgi qajetti salasy. Mádenieti men óneri órkendegen qoǵam ár ýaqytta ilgerilep, damidy» dep atap ótken bolatyn. Memleket basshysynyń rýhani-mádeni, jasampazdyq áleýetin odan ári nyǵaitý jolyndaǵy eńbegi, óner adamdary men talanttarǵa degen erekshe yqylasy úshin oblystyq mádeniet qyzmetkerleri atynan sheksiz alǵysymdy bildiremin. Halqymyzdyń rýhani bolmysy, jan-dúniesi – mádenieti arqyly kórinis tabady. Endeshe, mádenietimizdi, baǵa jetpes ónerimizdi nasihattaý jolyndaǵy eńbegimiz eselene bersin, – dedi A.Batalov.
Halyqqa sapaly mádeni qyzmet kórsetý úshin salanyń materialdyq -tehnikalyq bazasyn nyǵaitý – basty nazarda.
Adamzat aqyl-oiynyń asyl kómbesi – kitaphana, óner ataýlynyń ishindegi eń bekzaty – teatr, el men ólke tarihynyń eńseli sóresi – mýzei, án men kúidiń merekeli ordasy – filarmoniia desek, osynyń bári de – mádeniet oshaqtary.
Búgingi kúni oblysymyzda 566 mádeniet jáne óner mekemeleri qyzmet etedi, olarda úsh myńnan astam qyzmetker eńbek etýde. Salanyń 2019 jylǵy biýdjeti – 6,6 mlrd. teńgeni quraidy. Sonymen qatar, oblysta jergilikti aqyn-jazýshylardy kótermeleý maqsatyndaǵy oblys ákiminiń arnaiy stipendiiasy jyl saiyn berilip keledi. Óner salasy qyzmetkerlerin yntalandyrý úshin oblys biýdjetinen de ártisterge arnaiy stipendiia taǵaiyndalýda.
Almaty oblysynda Elbasymyzdyń «Rýhani jańǵyrý» baǵdarlamasy aiasynda birshama sharalar atqaryldy. Atap aitar bolsaq, Qarasai aýdanynda sáýleti qaitalanbas erekshe «Batyr babalar» memorialdy kesheni, Tuńǵysh Prezidentimizdiń «Atameken» tarihi-mádeni ortalyǵy jáne Jarkent qalasynda Orbulaq memorialdy kesheni boi kóterdi.
Sondai-aq, Iliias Jansúgirov atyndaǵy Mádeniet saraiyna kúrdeli jóndeý júrgizilse, Jańalyq aýylyndaǵy saiasi qýǵyn-súrgin qurbandaryna arnalǵan mýzei saltanatty túrde tabystaldy.
Atqarylǵan sharalardyń maqsaty bir, ol – mádeniet salasyndaǵy qyzmetkerlerge jaǵdai jasaý, rýhani qundylyqtardy dáripteý.
Mádeniet maýsymynyń ashylýy qaiyrymdylyq sharamen jalǵasyn tapty.
Qazaqstannyń Halyq ártisi Almahan Kenjebekova men Qazaqstannyń eńbek sińirgen qairatkeri Áli Alpysbaev, Kerbulaq aýdanynan kelgen 5 balanyń anasy Juldyz Sultanbaevaǵa úi kiltin tabys etse, Qaratal aýdanynan kelgen 4 balanyń anasy Ainur Isaevany qýantý baqyty «Jetisý» gazetiniń bas redaktory Ámire Árin men jas jazýshy Esbolat Aidabosynǵa buiyrdy.Aqsý aýdanynan kelgen kópbalaly ana Tolqyn Jatqanbaevany oblystaǵy asabalar atynan Erdáýlet Kenjequlov jáne Qairat Qazkenuly úi kiltin tapsyryp qýantsa, Tekeli qalasynan kelgen 6 balanyń anasy Maqai Qalimanǵa aýdandyq, qalalyq gazetterdiń bas redaktorlary men qyzmetkerleri atynan «Taldyqorǵan» gazetiniń bas redaktory Daniiar Seisenbaev pen «Jetisý shuǵylasy» gazetiniń bas redaktory Janahmet Isabekov páter kiltin saltanatty túrde tabystady.
Oblys ákimi Amandyq Batalov ta baspana baqytyna ie bolǵan otbasylarǵa syi-siiapattaryn tartý etti.
Baspanaly bolǵan kóp balaly analar men kishkentai búldirshinderdiń qýanyshynda shek joq.
– Osyndai ataýly mereke qarsańynda keń saraidai úige qol jetkizgenimizge qýanyshtymyz. Árine qiyndyqtar boldy, onyń bári artta qalyp, ańsaǵan armanymyz oryndaldy. Balalaryma baqyt syilaǵan jandarǵa alǵysym sheksiz, – dedi Kerbulaq aýdanynan kelgen 5 balanyń anasy Juldyz Sultanbaeva.
Shara mádeniet ujymdarynyń qoiǵan kontsertin tamashalaǵan kópshilik naǵyz merekeni sezinip, ónerdiń san túrimen sýsyndap qaitty.
Aita keteiik, biylǵy jyldyń mádeniet qyzmetkerleri úshin aitýly jańalyqtardyń biri, Prezidentimiz Qasym-Jomart Toqaev Qazaqstan halqyna alǵashqy Joldaýynda, 2020 jyldan bastap, mádeniet salasynda jumys isteitin qyzmetkerlerdiń ailyq jalaqysy kóterip, áleýmettik sharalar qarastyrý jónindegi tapsyrmasy boldy.
Baljan QAIRATQYZY,
Almaty oblysy
