Almaty oblysyna QR Mádeniet jáne aqparat vitse-ministri Rýstam Áli jumys saparymen keldi, dep habarlaidy Dalanews.kz
Aimaqqa kelgen vitse-ministr aldymen Ile aýdanyna baryp, N. Tilendiev atyndaǵy mádeniet úiiniń jumysymen tanysty. Odan keiin Qonaev qalasyndaǵy jańǵyrtýdan ótken kitaphanaǵa bardy. Sondai-aq, ol Qonaev qalasynyń turǵyndarymen kezdesý ótkizdi.
Kezdesý barysynda Rýstam Áli respýblikada 5 229 buqaralyq aqparat quraly resmi tirkelgenin aitty. Onyń ishinde Almaty oblysynda 20 merzimdi basylym, 2 tele-radio arna jáne 1 oblystyq internet-sait jumys isteidi.
«Buryn buqaralyq aqparat quraldarynyń 80%-y memlekettik bolsa, qazir olardyń 90%-y jekemenshik. Bul tek sandyq kórsetkish emes. Iaǵni, sala damyp, medianyń básekege qabilettiligi artyp keledi», – dedi vitse-ministr.
Sonymen qatar, ol ótken jyly Prezidenttiń tapsyrmasymen qabyldanǵan «Mass media týraly» jáne «Onlain-platformalar jáne onlain-jarnama týraly» zańdardyń mańyzyna toqtaldy.
Onyń aitýynsha, «Mass media týraly» zań tirkelgen BAQ qyzmetin retteýge jáne aqparattyq qaýipsizdikti qamtamasyz etýge baǵyttalǵan. Sondai-aq, bul zań aiasynda memlekettik aqparattyq saiasatty júzege asyratyn biryńǵai media platformany qurý, jýrnalisterdi jeńildetilgen tártippen tirkeý siiaqty mindetter qarastyrylǵan.
Vitse-ministr mádeniet salasyna da toqtalyp ótti. Onyń málimetinshe, Almaty oblysynda respýblikalyq mańyzy bar 10, jergilikti mańyzy bar 799 tarihi-mádeni eskertkish bar. Qazirgi ýaqytta óńirdegi 13 mádeni nysanǵa jóndeý jumystary júrgizilýde, al 4 nysannyń qurylysy aiaqtalǵan.
Sondai-aq, jaqyn ýaqytta 2 mádeni nysannyń irgetasy qalanyp, taǵy 7 nysan jóndeýden ótedi dep josparlanýda.
Kezdesý barysynda Rýstam Áli onomastika salasyndaǵy jumystarǵa da toqtaldy.
Onyń aitýynsha, bul baǵytta Almaty oblysy kósh bastap tur.
«2024–2025 jyldarǵa arnalǵan jol kartasy aiasynda oblysta 800-ge jýyq kósheniń ataýyn ózgertý boiynsha jumystar júrgizildi. Sonymen qatar, 150-den astam ardagerdiń esimi óńir kóshelerine berildi», – dedi ol.
Jiynda úkimettik emes uiymdardyń jumysy týraly da aityldy. Sońǵy 5 jylda ÚEU jobalaryn qarjylandyrý kólemi úsh esege ósip, jobalar sany 1 708-den 2 162-ge deiin artqan.
Almaty oblysynda biyl jalpy quny 1 254,2 mln teńge bolatyn 90 áleýmettik joba júzege asyrylyp jatyr.
Kezdesý barysynda turǵyndar ózderin alańdatqan máselelerdi de kóterdi. Atap aitqanda, aýyldyq jerlerde mádeniet úileriniń jetispeýshiligi sóz boldy. Turǵyndar Alataý qalasynda mádeniet úii joq ekenin jetkizdi.
Óz kezeginde Rýstam Áli bul másele jergilikti deńgeide sheshilýi tiis ekenin aityp, ony oblys basshylyǵyna jetkizetinin málimdedi.
Jiyn sońynda azamattardy jeke qabyldaý ótip, keiin vitse-ministr BAQ ókilderimen baspasóz máslihatyn ótkizdi.
Aimaqtyń damýyna qatysty pikir bildirgen vitse-ministr oblys basshylyǵyna birqatar mańyzdy usynystar joldaitynyn atap ótti.
