Qorǵanys ministrliginiń mamandarynan bólek, izdeýge Tótenshe jaǵdailar ministrligi, Ishki ister ministrligi jáne basqa da memlekettik qurylymdardyń qyzmetkerleri qatysýda.
Qorǵanys ministri aviatsiia general-leitenanty Dáýren Qosanovtyń tapsyrmasy boiynsha arnaiy komissiia qurylyp, quramyna Memlekettik aviatsiianyń ushý qaýipsizdigi departamentiniń joǵary bilikti mamandary kirdi. Komissiianyń bir bóligi izdestirýge jumyldyrylǵan, taǵy bir bóligi aviatsiialyq intsidentti tergeý is-sharalaryn júrgizip jatyr.
Kól túbiniń tereń shógýi, sý astyndaǵy nóldik kóriný jáne aýa-raiynyń qubylmalylyǵy siiaqty qiyn jaǵdailarǵa qaramastan, izdeý jumystary táýlik boiy júrgizilýde.
"Ótýi qiyn aýdandarǵa áýeden sholýlar jasalyp, jaǵalaý beldeýi men kól akvatoriiasy tekserilýde. Sý asty jáne jer ústi izdeýlerine arnaiy jabdyqtardy paidalanatyn ǵylymi jáne tehnikalyq uiymdar tartylǵan. Sonymen birge, tehnikalyq tergeý jalǵasýda. Komissiia áýe kemesin daiyndaý jáne paidalaný jónindegi qujattamany, quqyq qorǵaý organdary men aviatsiialyq qyzmetterdiń materialdaryn, tikushaq baǵytyndaǵy meteorologiialyq jáne ornitologiialyq jaǵdaidy jáne basqa da faktorlardy zerdelep jatyr", – dedi Áskeri-áýe kúshteriniń qolbasshysy aviatsiia general-maiory Asqar Izbasov.
Izdeý jumystary joǵalǵan tikushaqtyń ekipaj músheleriniń taǵdyry anyqtalyp, qaiǵyly jaǵdaiǵa ákelgen sebepter anyqtalǵanǵa deiin jalǵasady.
Aita ketsek, Almaty oblysynda 2025 jyldyń 25 shildesinde ES-145 áskeri tikushaǵy radardan joǵalyp ketti. Erteńinde Sorbulaq kóli mańynda joǵalyp ketken tikushaqtiki bolýy múmkin qaldyq bólshekter tabyldy.
