قورعانىس مينيسترلىگىنىڭ ماماندارىنان بولەك، ىزدەۋگە توتەنشە جاعدايلار مينيسترلىگى، ىشكى ىستەر مينيسترلىگى جانە باسقا دا مەملەكەتتىك قۇرىلىمداردىڭ قىزمەتكەرلەرى قاتىسۋدا.
قورعانىس ءمينيسترى اۆياسيا گەنەرال-لەيتەنانتى داۋرەن قوسانوۆتىڭ تاپسىرماسى بويىنشا ارنايى كوميسسيا قۇرىلىپ، قۇرامىنا مەملەكەتتىك اۆياسيانىڭ ۇشۋ قاۋىپسىزدىگى دەپارتامەنتىنىڭ جوعارى بىلىكتى ماماندارى كىردى. كوميسسيانىڭ ءبىر بولىگى ىزدەستىرۋگە جۇمىلدىرىلعان، تاعى ءبىر بولىگى اۆياسيالىق ينسيدەنتتى تەرگەۋ ءىس-شارالارىن جۇرگىزىپ جاتىر.
كول ءتۇبىنىڭ تەرەڭ شوگۋى، سۋ استىنداعى نولدىك كورىنۋ جانە اۋا-رايىنىڭ قۇبىلمالىلىعى سياقتى قيىن جاعدايلارعا قاراماستان، ىزدەۋ جۇمىستارى تاۋلىك بويى جۇرگىزىلۋدە.
"ءوتۋى قيىن اۋداندارعا اۋەدەن شولۋلار جاسالىپ، جاعالاۋ بەلدەۋى مەن كول اكۆاتورياسى تەكسەرىلۋدە. سۋ استى جانە جەر ءۇستى ىزدەۋلەرىنە ارنايى جابدىقتاردى پايدالاناتىن عىلىمي جانە تەحنيكالىق ۇيىمدار تارتىلعان. سونىمەن بىرگە، تەحنيكالىق تەرگەۋ جالعاسۋدا. كوميسسيا اۋە كەمەسىن دايىنداۋ جانە پايدالانۋ جونىندەگى قۇجاتتامانى، قۇقىق قورعاۋ ورگاندارى مەن اۆياسيالىق قىزمەتتەردىڭ ماتەريالدارىن، تىكۇشاق باعىتىنداعى مەتەورولوگيالىق جانە ورنيتولوگيالىق جاعدايدى جانە باسقا دا فاكتورلاردى زەردەلەپ جاتىر"، – دەدى اسكەري-اۋە كۇشتەرىنىڭ قولباسشىسى اۆياسيا گەنەرال-مايورى اسقار ءىزباسوۆ.
ىزدەۋ جۇمىستارى جوعالعان تىكۇشاقتىڭ ەكيپاج مۇشەلەرىنىڭ تاعدىرى انىقتالىپ، قايعىلى جاعدايعا اكەلگەن سەبەپتەر انىقتالعانعا دەيىن جالعاسادى.
ايتا كەتسەك، الماتى وبلىسىندا 2025 جىلدىڭ 25 شىلدەسىندە ەس-145 اسكەري تىكۇشاعى راداردان جوعالىپ كەتتى. ەرتەڭىندە سوربۇلاق كولى ماڭىندا جوعالىپ كەتكەن تىكۇشاقتىكى بولۋى مۇمكىن قالدىق بولشەكتەر تابىلدى.
