Almaty – Bishkek avtojolynyń 129-shaqyrymynda iri jol-kólik oqiǵasy bolyp, saldarynan jeti adam qaza tapty, dep habarlaidy Dalanews.kz.
Politsiianyń aldyn ala málimetinshe, Honda Odissei kóliginiń júrgizýshisi aldynan kele jatqan HOWO júk kóliginiń tirkemesine soǵylǵan. Soqqynyń qatty bolǵany sonshalyq, jeńil avtokólikte bolǵan jeti adam, onyń ishinde júrgizýshi de alǵan jaraqattarynan oqiǵa ornynda jan tapsyrǵan.
Oqiǵa boiynsha tergeý amaldary júrgizilip jatyr.
Bul keiingi on kúnde oblysta tirkelgen ekinshi qaiǵyly jaǵdai. Buǵan deiin dál osy tasjolda jol apatynan alty adam qaza tapqan.
Aita keteiik, buǵan deiin Batys Qazaqstan oblysynda da jantúrshigerlik jol apaty bolyp, saldarynan segiz adam qaza tapqan edi.
Taldaý
Bas prokýratýranyń málimetinshe, Qazaqstanda jol apatyna kináli júrgizýshilerdiń 81%-y buǵan deiin de jol qozǵalysy erejelerin buzǵany úshin birneshe ret jaýapkershilikke tartylǵan, bul qaitalaný deńgeiiniń joǵary ekenin dáleldeidi.
Máselen, ShQO-da bir júrgizýshi bir jyl ishinde 32 ret ereje buzyp, onyń 13-i – jyldamdyqty arttyrý faktileri. 8 qańtarda qarsy jolaqqa shyǵyp, saldarynan ózi jáne eki jolaýshysy qaza tapty. Mundai jaǵdailar jyl saiyn qaitalanady.
Taǵy bir jaǵdaida júrgizýshi sońǵy eki jylda 72 ret jol qozǵalysy erejesin buzǵan, onyń ishinde 2025 jyly jyldamdyqty arttyrǵany úshin 30 ret jaýapkershilikke tartylǵan. Nátijesinde aǵymdaǵy jyldyń 30 tamyzynda Almaty qalasynda jaiaý júrginshini qaǵyp, onyń ólimine ákelgen.
Statistika
Sonymen qatar, Bas prokýratýranyń Quqyqtyq statistika komitetiniń derekterine sáikes, Qazaqstanda 2025 jyldyń alǵashqy tórt aiynda jol-kólik oqiǵalarynyń sany kúrt artqan. 9,2 myń jol apaty tirkelgen, bul 2023 jyldyń dál osy merzimimen salystyrǵanda úsh ese kóp. Apat saldarynan 558 adam qaza tapty, shamamen 12,5 myń adam túrli jaraqattar aldy.
