Almaty oblysy Eńbekshiqazaq aýdanyna qarasty Azat aýylyndaǵy mektep birneshe jyldan beri qoǵam nazarynanan túspei keledi. Sebebi bir ǵasyrdan astam ýaqyt buryn balshyqtan turǵyzylǵan ǵimarattyń qazirgi jaǵdaiy múshkil. Ustaz ári qoǵam belsendisi Sultan Súleevtiń aitýynsha, jańa mektep salý jónindegi bilik ýádesi jyldar boiy oryndalmai keledi. Bul týraly ol Dalanews.kz redaktsiiasyna málimdedi.
Muǵalimniń ýáji
Sultan Súleev bul máseleni 2023 jyldan beri turaqty túrde kóterip kele jatqanyn alǵa tartty. Alaida osy ýaqyt ishinde túrli deńgeidegi basshylar tarapynan ýáde kóp bolǵanymen, naqty nátije bolmaǵan.
Qazirgi tańda mektep karantinge jabylyp, oqýshylar onlain oqýǵa kóshirilgen.
“Kezdesken bastyqtardyń barlyǵy qatyramyz, soǵamyz dep ant-sý ishedi. Úsh jyl boldy, saýsaqtaryn qimyldatpady sabazdar. Menen qutylý úshin ýáde bere salý ońai olarǵan”, — deidi ol.
Ustazdyń aitýynsha, sol kezdegi Oqý-aǵartý ministri Ǵani Beisembaev ta mektep máselesin jeke baqylaýyna alatynyn aitqan. Onyń aitýynsha, sol kezeńde ministrliktiń qolynda jemqorlardan qaitarylǵan qarajat bolǵan. Ministr Azat aýylyna mektep salýdy jeke baqylaýyna alatynyn aityp, qarajat bólinetinine ýáde bergen. Alaida bul da oryndalmaǵan.
“Ministrliktiń, oblystyń, aýdannyń qurylys basqarmalary isti bir-birine siltep, sozbaqqa saldy. Mektep direktory da, ustazy da ministrge bardy. Ata-analar oblys ákimine deiin kirdi. Biraq bárine “ne polojeno” degen jaltarma jaýap qaitaryldy”, – deidi ol.
Sondai-aq Almaty oblystyq bilim basqarmasynyń qazirgi basshysy Arailym Tóleýbekova da mektep máselesine qatysty ýáde bergen.
“2025 jyly qurylys bastalady dedi. Biraq mundai ýádeni bilik on jyl boiy berip keledi. Sondyqtan sený qiyn”, – deidi Sultan Súleev.
Ol memlekettik qyzmetkerlerdiń ant berý rásimine de kúmánmen qaraitynyn jasyrmaidy.
“Memlekettik qyzmetkermiz dep ant bergen de shyǵar. Biraq ol ant kresloǵa otyrar aldyndaǵy paidasyz ritýal ma dep oilaimyn. Eldiń tilegine qulaq aspasa, anttyń ne keregi bar?” – deidi ol.
Qazir Sultan Súleev bar úmitin jańa ministr Juldyz Súleimenovaǵa artyp otyr.
“Siz Almatyǵa kelip, menimen kezdesemin depsiz. Meniń keregim joq. Osy mektepke baryp kóreiik. Kún sýyqta baraiyq. Oblystyq jáne aýdandyq bilim basqarmasynyń basshylary da kelsin. Óz kózderimen kórsin”, - dep atap ótti ol.
Ata-analardyń ujymdyq úndeýi
2023 jyldyń sońynda oqýshylardyń ata-analary Oqý-aǵartý ministrine, oblystyq bilim basqarmasyna, oblys ákimine jáne kásipodaq basshylyǵyna da ujymdyq hat joldaǵan.
Hatta ata-analar mekteptiń óte aýyr jaǵdaida ekenin ashyq jazǵan.
“Mektep 1923 jyly salynǵan. 2023 jyly 100 jyldyǵyn atap ótti. Qazirgi tańda mektep 140 oqýshyǵa eseptelgen, al is júzinde 427 bala oqyp jatyr”, – delingen hatta.
Ata-analardyń aitýynsha, mektepte eshqashan kúrdeli jóndeý júrgizilmegen, tek jyl saiyn kosmetikalyq jóndeýmen shektelgen.
“Temperatýralyq rejim óte nashar – synyptarda 15–17 gradýs, keide 18–20 gradýsqa áreń jetedi. Sondyqtan kóptegen synypta elektr jylytqyshtaryn qoldanýǵa májbúrmiz”, – dep jazǵan olar.
Sonymen qatar hatta ǵimarattyń qaýipsizdigine tikelei qater bar ekeni de aitylǵan.
“Mektep qabyrǵalary sharýashylyq tásilmen, balshyq negizinde salynǵan. Tóbeniń sylaǵy keide qulap, balalar men qyzmetkerlerdiń ómirine qaýip tóndiredi. Ǵimarat seismikalyq talaptarǵa sai emes”, – dep kórsetilgen.
Ata-analar hatynda aýyldyń dál janynda 2016 jyly salynǵan jańa mekteptiń jaǵdaiymen salystyrý da bar.
“2016 jyly 300 oryndyq jańa mektep salyndy. Qazir onda 500-ge jýyq oqýshy oqyp jatyr. Kabinetteri keń, jaryq, jyly, ashanasy bar. Bir aýylda turyp, balalarymyzdyń osyndai teńsiz jaǵdaida bilim alýy ádiletsiz”, – deidi ata-analar.
Soǵan qaramastan, ata-analar eski mektepten ketýdi emes, jańa mektep salynýyn talap etip otyrǵanyn aitady.
“Biz 100 jyldyq mektepten ketkimiz kelmeidi. Munda muǵalimder myqty, balalarymyz jyl saiyn túrli deńgeidegi olimpiadalardyń júldegeri atanyp júr”, – dep jazylǵan hatta.
Ata-analar 2022 jyly Rahat aýyldyq okrýgi jańa mektep salý úshin 2 gektar jer bólgenin de atap ótken.
Ministrlik ne dedi?
Ata-analardyń jáne ustazdardyń úndeýine 2024 jylǵy qańtarda QR Oqý-aǵartý ministrligi resmi jaýap bergen. Qujatta Azat aýylynda jańa mektep salý Ulttyq joba aiasynda qarastyrylmaǵany aitylǵan.
"Ulttyq jobaǵa sáikes, 2024–2025 jyldary Eńbekshiqazaq aýdanynda 16 800 oryndyq 10 mektep paidalanýǵa beriledi. Alaida bul tizimde Azat aýyly joq”, – delingen ministrlik jaýabynda.
Sonymen qatar ministrlik “Qolaily mektep” ulttyq jobasy men Infraqurylymdy qoldaý qory arqyly qarjylandyrý múmkin ekenin atap ótken.
“Almaty oblysynyń ákimdigi qajet qujattardy usynǵan jaǵdaida, Azat aýylynda mektep salýdy Qor esebinen qarastyrýǵa bolady”, – dep kórsetilgen.
Iaǵni jaýapta naqty merzim de, naqty sheshim de joq.
Aýdandyq bilim bóliminiń jaýaby
Eńbekshiqazaq aýdandyq bilim bólimi de ata-analarǵa jaýap bergen. Bul jaýapta mekteptiń jaǵdaiy “qanaǵattanarlyq” dep baǵalanǵan.
“Azat negizgi orta mektebi apatty dep tanylmaǵan, jaǵdaiy qanaǵattanarlyq”, – delingen resmi hatta.
Sonymen birge ata-analarǵa balalaryn basqa mektepke aýystyrý quqyǵy bar ekeni eskertilgen.
“Zańǵa sáikes, ata-analar balany basqa bilim berý uiymyna aýystyrý týraly sheshimdi ózderi qabyldai alady”, – dep jazylǵan.
Alaida bul jaýap ta ata-analar kótergen negizgi máseleni – sýyq, eski jáne qaýipti ǵimaratta oqý problemasyn sheshpeidi.
Ata-analardyń ujymdyq haty, ministrlik pen aýdandyq bilim bóliminiń jaýaptary bul máseleniń jyldar boiy sozylyp kele jatqanyn jáne naqty sheshim qabyldanbaǵanyn anyq kórsetedi.
