Halyqaralyq valiýta qorynyń (HVQ) jańartylǵan boljamyna sáikes, 2031 jyly Qazaqstandaǵy jan basyna shaqqandaǵy jalpy ishki ónim (JIÓ) 23,17 myń dollarǵa jetedi. Bul kórsetkish Baltyq elderin eseptemegende, postkeńestik keńistiktegi eń joǵary deńgei bolmaq, dep habarlaidy dalanews.kz.
HVQ dereginshe, 2025 jyldyń qorytyndysynda Qazaqstanda jan basyna shaqqandaǵy JIÓ 15 myń dollardan asty. Al 2026 jyly bul kórsetkish 17,5 myń dollarǵa, 2027 jyly – 18,55 myń dollarǵa jetedi dep kútiledi.
Sondai-aq:
– 2028 jyly – 19,54 myń dollar,
– 2029 jyly – 20,69 myń dollar,
– 2030 jyly – 21,87 myń dollar bolady degen boljam bar.
Qor boljamyna sáikes, 2027 jyly Qazaqstan jan basyna shaqqandaǵy JIÓ kólemi boiynsha Reseiden ozady. Reseide bul kórsetkish 17,71 myń dollar deńgeiinde bolady dep kútilip otyr.
Jalpy alǵanda, aldaǵy bes jylda Qazaqstandaǵy jan basyna shaqqandaǵy JIÓ 32,4%-ǵa ósedi degen boljam jasalǵan.
Postkeńestik elder arasyndaǵy eń joǵary ósim Moldovada tirkelýi múmkin. Onda 2026 jylǵy 9,35 myń dollarlyq kórsetkish 2031 jyly 15,33 myń dollarǵa deiin ósip, 63,9%-dyq ósim kórsetedi.
Al eń tómengi kórsetkish Tájikstanda bolady dep boljanyp otyr. 2031 jyly bul eldegi jan basyna shaqqandaǵy JIÓ nebári 2,43 myń dollardy quraýy múmkin.
2031 jylǵa deiingi boljam boiynsha ózge elderdegi ósim:
– Grýziia – 58,6%,
– Ózbekstan – 51,5%,
– Armeniia – 39,3%,
– Túrikmenstan – 31,38%,
– Ázerbaijan – 28,1%,
– Ýkraina – 25,5%,
– Qyrǵyzstan – 24,1%.
Al Reseide jan basyna shaqqandaǵy JIÓ kórsetkishi bes jyl ishinde 0,27%-ǵa tómendeidi degen boljam jasalǵan.
