Astanadaǵy №36 mektepte oqýshylar arasynda bolǵan tóbelesten keiin ata-analar bilim ordasyndaǵy ahýaldyń kúrt nasharlaǵanyn málimdedi. Olardyń aitýynsha, mektep ákimshiligi oqiǵaǵa qatysty ashyq ári ádil tekserý júrgizýdiń ornyna, janjalǵa bailanysty beinejazbalardy joiýǵa tyrysqan bolýy múmkin. Ásirese joǵary synyp oqýshylarynyń telefondaryndaǵy videolardy óshirýge áreket jasalǵany týraly aqparat taraǵan, dep habarlaidy Dalanews.kz.
Ata-analar mundai áreketter jaǵdaidy ýshyqtyryp, mektepke degen senimdi álsiretkenin aitady.
Oqýshylardyń ózderi de ákimshilik tarapynan qysym bolǵanyn jetkizgen. Olardyń sózinshe, bul mekteptegi psihologiialyq ahýalǵa keri áser etip, qaýipsizdik sezimin tómendetken.
«Biz, ata-analar, qalyptasqan jaǵdaidan sharshadyq. Mektep direktory qaýipsiz ári ashyq bilim berý ortasyn qamtamasyz ete almai otyr dep sanaimyz. Sondyqtan ony qyzmetinen bosatýdy talap etemiz», - delingen ata-analardyń úndeýinde.
Al qalalyq bilim basqarmasy tóbeleske qatysqan oqýshylar mektepishilik esepke alynǵanyn habarlady. Qazirgi ýaqytta olarmen profilaktikalyq jumystar júrgizilip, psihologtar tartylǵan. Mektep basshylyǵyna tártiptik jaza retinde sógis berilgen.
Sonymen qatar janjalǵa qatysqan jasóspirimderdiń ata-analary da balalaryn tárbieleý mindetin tiisti deńgeide oryndamaǵany úshin jaýapkershilikke tartylǵan.
