Almaty oblysynda azyq-túlik shyǵaratyn zaýyt ashylady
Kezdesý barysynda investorlar jobanyń júzege asyrylý barysy, jergilikti atqarýshy organmen birlesip sheshýge tiis birqatar máseleler týraly baiandady.
«Mareven Fýd Holdings» holdinginiń atqarýshy direktory Mishel Changtyń aitýynsha, qazirgi kezde zaýyttyń óndiristik jáne injenerlik kesheni daiyn, ishki injenerlik kommýnikatsiiasy tolyǵymen júrgizilgen. Qajetti qural-jabdyqtar satyp alynyp, qoimada saqtaýly. 1-shi testik jelisi sáýir aiynda iske qosylyp, alǵashqy ónimderi shyǵarylady. Zaýyt naryqqa kásiporyn iske tolyq qosylǵannan keiin shyqpaq. Zaýyttyń maýsym aiynyń sońynda ashylady dep josparlanǵan.
Kezdesýde aitylǵandai, 2018 jylǵa 24 mlrd. teńge bolatyn satylym kólemi belgilenip otyr. Zaýyt tez pisetin kespe, sorpa dámdeýishteri, makarondar – jalpy sany 15 túrli ónim shyǵaratyn bolady. Daiyn ónimniń 70 %-i Aziianyń 5 eline, Monǵoliia men Qytaiǵa shyǵarylmaqshy. Óndiris barysynda 5 ónim – un, tuz, karton jáne basqa da qazaqstandyq ónimder qoldanylady. Kásiporyn 500 adamdy turaqty jumys ornymen qamttdy, onyń 90%-in jergilikti turǵyndar quramaqshy.
Investorlar zaýytqa kire beriske deiin jol tóseý, temir jolǵa shyǵatyn múmkindik jasaý qajettilikterin aitty. Oblys ákimi Amandyq Batalov bul máselelerdi sheshýdi baqylaýyna alatynyn jetkizdi.
Oblys ákiminiń orynbasary Jeńis Tuiaqovtyń aitýynsha, qiyrshyq tas-qum tóseletin joldyń qurylysy naýryzda aiaqtalsa, aýa raiynyń qolailylyǵyna qarai sáýir-mamyr ailarynda asfalt tóseletin bolady. Temir jol máselesi de jyl sońyna deiin sheshimin tappaq. Zaýyt Qapshaǵai qalasyndaǵy gaz jelisine qosylady.
Kezdesýdi qorytyndylaǵan oblys ákimi A. Batalov:
– Bizdiń oblystyń aýmaǵynda osyndai iri investitsiialyq jobanyń júzege asyrylyp jatqanyna qýanyshtymyn. Bul kásiporyn óz kezeginde oblystyń azyq-túlik óndirisine óziniń úlken úlesin qosatyn bolady. Eń bastysy, zaýyt 500 turaqty jumys ornyn qura otyryp, jergilikti turǵyndardy jumyspen qamtidy. Oǵan qosa ónim ózimizdiń otandyq unnan daiyndalyp, daiyn ónim «Qazaqstanda jasalǵan» degen belgimen eksportqa shyǵarylatyn bolady, – dedi.
Almaty oblysy ákiminiń baspasóz qyzmeti.
