كەزدەسۋ بارىسىندا ينۆەستورلار جوبانىڭ جۇزەگە اسىرىلۋ بارىسى، جەرگىلىكتى اتقارۋشى ورگانمەن بىرلەسىپ شەشۋگە ءتيىس ءبىرقاتار ماسەلەلەر تۋرالى باياندادى.
«ماريەۆەن فۋد حولدينگس» حولدينگىنىڭ اتقارۋشى ديرەكتورى ميشەل چانگتىڭ ايتۋىنشا، قازىرگى كەزدە زاۋىتتىڭ وندىرىستىك جانە ينجەنەرلىك كەشەنى دايىن، ىشكى ينجەنەرلىك كوممۋنيكاسياسى تولىعىمەن جۇرگىزىلگەن. قاجەتتى قۇرال-جابدىقتار ساتىپ الىنىپ، قويمادا ساقتاۋلى. 1ء-شى تەستىك جەلىسى ءساۋىر ايىندا ىسكە قوسىلىپ، العاشقى ونىمدەرى شىعارىلادى. زاۋىت نارىققا كاسىپورىن ىسكە تولىق قوسىلعاننان كەيىن شىقپاق. زاۋىتتىڭ ماۋسىم ايىنىڭ سوڭىندا اشىلادى دەپ جوسپارلانعان.
كەزدەسۋدە ايتىلعانداي، 2018 جىلعا 24 ملرد. تەڭگە بولاتىن ساتىلىم كولەمى بەلگىلەنىپ وتىر. زاۋىت تەز پىسەتىن كەسپە، سورپا دامدەۋىشتەرى، ماكاروندار – جالپى سانى 15 ءتۇرلى ءونىم شىعاراتىن بولادى. دايىن ءونىمنىڭ 70 %ء-ى ازيانىڭ 5 ەلىنە، مونعوليا مەن قىتايعا شىعارىلماقشى. ءوندىرىس بارىسىندا 5 ءونىم – ۇن، تۇز، كارتون جانە باسقا دا قازاقستاندىق ونىمدەر قولدانىلادى. كاسىپورىن 500 ادامدى تۇراقتى جۇمىس ورنىمەن قامتتدى، ونىڭ 90%ء-ىن جەرگىلىكتى تۇرعىندار قۇراماقشى.
ينۆەستورلار زاۋىتقا كىرە بەرىسكە دەيىن جول توسەۋ، تەمىر جولعا شىعاتىن مۇمكىندىك جاساۋ قاجەتتىلىكتەرىن ايتتى. وبلىس اكىمى اماندىق باتالوۆ بۇل ماسەلەلەردى شەشۋدى باقىلاۋىنا الاتىنىن جەتكىزدى.
وبلىس اكىمىنىڭ ورىنباسارى جەڭىس تۇياقوۆتىڭ ايتۋىنشا، قيىرشىق تاس-قۇم توسەلەتىن جولدىڭ قۇرىلىسى ناۋرىزدا اياقتالسا، اۋا رايىنىڭ قولايلىلىعىنا قاراي ءساۋىر-مامىر ايلارىندا اسفالت توسەلەتىن بولادى. تەمىر جول ماسەلەسى دە جىل سوڭىنا دەيىن شەشىمىن تاپپاق. زاۋىت قاپشاعاي قالاسىنداعى گاز جەلىسىنە قوسىلادى.
كەزدەسۋدى قورىتىندىلاعان وبلىس اكىمى ا. باتالوۆ:
– ءبىزدىڭ وبلىستىڭ اۋماعىندا وسىنداي ءىرى ينۆەستيسيالىق جوبانىڭ جۇزەگە اسىرىلىپ جاتقانىنا قۋانىشتىمىن. بۇل كاسىپورىن ءوز كەزەگىندە وبلىستىڭ ازىق-تۇلىك وندىرىسىنە ءوزىنىڭ ۇلكەن ۇلەسىن قوساتىن بولادى. ەڭ باستىسى، زاۋىت 500 تۇراقتى جۇمىس ورنىن قۇرا وتىرىپ، جەرگىلىكتى تۇرعىنداردى جۇمىسپەن قامتيدى. وعان قوسا ءونىم ءوزىمىزدىڭ وتاندىق ۇننان دايىندالىپ، دايىن ءونىم «قازاقستاندا جاسالعان» دەگەن بەلگىمەن ەكسپورتقا شىعارىلاتىن بولادى، – دەدى.
الماتى وبلىسى اكىمىنىڭ باسپا ءسوز قىزمەتى.
