Jiynda quttyqtaý sóz sóilegen oblys ákimi Amandyq Batalov oblystyq eki gazettiń aqparat keńistigindegi olardyń róline toqtalyp ótti.
- Búgin «Jetisý» jáne «Ogni Alataý» gazetteriniń 100 jyldyǵyna arnalǵan saltanatty kesh jýrnalisterdiń kásibi merekesi qarsańynda atalyp, qos qýanysh qatar kelip otyr. Sondyqtan barsha jýrnalisterdi tól merekelerimen quttyqtap, shyǵarmashylyq tabys tileimin! Bul eki gazet óziniń ǵasyrlyq ǵurymynda qandai dáýirdi, qandai kezeńderdi bastan keshirse de, maqsat-múddesi ózgergen joq, - dedi A. Batalov.
Jýrnalister qaýymyna áriptestik bailanysy úshin rizashylyǵyn aita kele:
- Sózdiń qýaty, jýrnalistikanyń qairaty qashanda myqty. Buqaralyq aqparat quraldary qashanda halyq pen biliktiń arasyndaǵy altyn kópir bolyp keledi.
Memlekettik saiasatty, el ishinde júrgizilip jatqan iri reformalardy, rýhani jańǵyrý qadamdaryn halyqqa jetkizýde BAQ bizge zor qoldaý kórsetip otyr.
Sol úshin barshańyzǵa rizashylyǵymdy bildiremin! Basty bailyǵymyz – Táýelsizdikti nyǵaitý jolyndaǵy eńbekterińiz jemisti, qalamdaryńyz qarymdy, merekelerińiz qutty bolsyn! – dedi óz sózinde oblys ákimi.
Budan ári marapattaý rásimine kóshken oblys basshysy A. Batalov aldymen QR Aqparat jáne kommýnikatsiia ministrliginiń «Aqparat salasynyń úzdigi» tósbelgisin «Jetisý» gazeti bas redaktorynyń orynbasary Jumatai Ámireevke, aǵa tilshi Qýat Qairabaevqa, jaýapty hatshy Gaýhar Dúisenbaevaǵa, sol siiaqty «Ogni Alataý» gazetiniń menshikti tilshisi Tanzilia Muhtarova men Vasilii Vorobevke taqty. Sondai-aq bir qaýym tilshiler oblys ákiminiń Qurmet gramotasyn jáne Alǵys hatyn, «Nur Otan» partiiasynyń «Belsendi qyzmeti úshin» tósbelgisin aldy.
Sonymen qatar oblys ákimi A. Batalov oblystyq «Jetisý» jáne «Ogni Alataý» gazetteriniń 6 jýrnalisine páter kiltterin usyndy.
Sondai-aq Qazaqstan jýrnalister odaǵynyń «Qazaqstannyń Qurmetti jýrnalisi» tósbelgisi «Jetisý» gazeti bas redaktorynyń orynbasary Núsipbai Ábdirahymǵa, «Ogni Alataý» gazeti bas redaktorynyń orynbasarlary Zabira Saidildina men Vitalii Pekelnikke «Ólke tynysy» JShS bas direktory Meiram Janádilov tapsyrdy.
Al Qoǵamdyq marapattar men ataqtar jónindegi respýblikalyq keńestiń «Qazaq jýrnalistikasynyń qairatkeri» medalimen birqatar ardagerler men gazetterdiń tájiribeli tilshilerin keńes tóraǵasy Marat Toqashbaev marapattady.
Marapattalǵandar qatarynda «Ogni Alataý» gazetiniń bas redaktory Atsalim Idigov pen «Ólke tynysy» JShS bas direktorynyń orynbasary Bolat Abaǵan da bar.
Jańa baspanaǵa ie bolǵandar atynan «Ogni Alataý» gazetiniń tilshisi Tatiana Demidova men jetisýlyq Asyl Sultanǵazy sóilep, oblysta jýrnalisterdiń jumys isteýine jaily jaǵdai jasalyp, gazetterdiń materialdyq-tehnikalyq bazasy jaqsarǵanyn, baspana máselesinde de qoldaý kórsetilip otyrǵanyna alǵys aitty.
Jiynda Qazaqstan Jýrnalister akademiiasynyń prezidenti Saǵymbai Qozybaev pen QR Qurmetti jýrnalisi Mamadiiar Jaqyp sóz sóilep, oblystyq gazetterdiń 100 jyldyǵymen quttyqtap, izgi tilekterin bildirdi.
Óz kezekterinde mereitoilyq eki gazettiń bas redaktorlary Atsalim Idigov pen Ámire Árin qalam ielerine qurmet kórsetip, sapaly jumys atqarýyna qolaily jaǵdai týyǵyzyp, qamqorlyq tanytyp otyrǵan oblys basshylyǵynyń atyna erekshe rizashylyqtaryn bildirdi. Budan bylai da memlekettik aqparattyq saiasatty ilgeriletýde laiyqty úles qosatyndyqtaryna sendirdi.
Shara sońy merekelik kontsertpen jáne saltanatty keshki aspen jalǵasty.
