Almaty oblysynyń Tuzdybastaý aýylynda 16 jastaǵy mektep oqýshysyn zorlady dep aiyptalǵan tórt jigit aqtalyp shyqty. Oqiǵa 2024 jylǵy 8 qazanda bolǵan, dep habarlaidy Dalanews.kz Batyr Jamal-ǵa silteme jasap.
Oqiǵa qalai bolǵan?
Sol kúni Arýjan (aty ózgertilgen) jattyǵýdan jaiaý qaityp kele jatqanda, qasyna ishinde tórt jigiti bar kólik toqtaǵan. Olardyń jasy 18 ben 23 aralyǵynda bolǵan. Jigitterdiń biri ózin qyzdyń sol kezde áskerde júrgen aǵasynyń dosymyn dep tanystyrsa, ekinshisin Arýjan burynnan biletin, olar bir mektepte oqyǵan.
Jigitter keshki ýaqyt qarańǵy ekenin aityp, qyzdy úiine jetkizip salýdy usynǵan. Jolai kólik basqa baǵytqa burylǵanda, Arýjandy «aldymen bir dosymyzdy úiine aparyp keleiik» dep tynyshtandyrǵan.
Alaida olar qyzdy elsiz jerge aparyp, zorlaǵan. Keiin Arýjandy búkil otbasyna ziian keltiremiz dep qorqytyp, túsirilgen videomen bopsalaǵan.
Qorqynysh pen únsizdik
Qorqyp qalǵan qyz uzaq ýaqyt boiy eshkimge tis jarmaǵan. Týystary onyń minez-qulqyndaǵy ózgeristi baiqaǵanymen, muny UBT aldyndaǵy kúizelis dep oilaǵan. Shyndyq tek 17 qazanda, synyp jetekshisi Arýjannyń aýyrsynýdy basatyn dárilerdi shamadan tys iship júrgenin anasyna aitqannan keiin belgili bolǵan.
Úide anasy «Ketanov» dárisiniń bos qaptamalaryn taýyp alady. Alǵashynda qyzynyń asqazanynda kinárat bar dep oilap, dárigerge aparmaq bolǵanda, Arýjan bárin aityp bergen.
Dálelderdiń joǵalýy jáne tergeý
Týystary oqiǵa bolǵan jer mańyndaǵy dúkennen beinebaqylaý jazbalaryn alýǵa tyrysqan. Alaida beineler bir táýlik qana saqtalatyndyqtan, ol kezde jazbalar óship ketken.
Otbasy birden politsiiaǵa júgingen. Alaida jábirlenýshi taraptyń anasynyń aitýynsha, tergeý men sot ádeii sozylǵan. Tergeý tek 2025 jyldyń shildesinde aiaqtalyp, sot protsesi ótken jyldyń qyrkúieginde ǵana bastalǵan.
Osy ýaqyt ishinde aýyl ishinde túrli qaýesetter tarap, istiń mán-jaiy jurt arasynda talqylanǵan. Qoǵamdyq qysymǵa shydamaǵan qyz eki ret ózine qol jumsaýǵa árekettengen.
Sottaǵy daýly tustar
Týystary is boiynsha bultartpas dálelder bolǵanyn aitady. Olardyń qatarynda dárigerlerdiń qorytyndysy, biologiialyq saraptama nátijeleri jáne kúdiktilerdiń biriniń bastapqyda bergen moiyndaý jaýaby bar. Alaida ol keiin bul sózinen bas tartqan.
Sonymen qatar, jábirlenýshi jaqtyń aitýynsha, aiyptalýshylardyń biriniń telefonynan ózge qyzdy zorlaý sáti túsirilgen video tabylǵan. Biraq sýdia bul materialdy iske qospaǵan.
Sot-meditsinalyq saraptama dene jaraqattary tirkelgenine qaramastan, jynystyq qatynastyń kúsh qoldaný arqyly bolǵanyn dáleldeitin aiǵaq jetkiliksiz degen qorytyndy jasaǵan.
Apelliatsiia
Aiyptalýshylardy aqtaý týraly úkim 29 qańtarda shyqqan. Arýjannyń týystary bul sheshimdi ádiletsiz dep sanap, Almaty oblystyq sotyna apelliatsiialyq shaǵym túsirdi.
