الماتى وبلىسىنىڭ تۇزدىباستاۋ اۋىلىندا 16 جاستاعى مەكتەپ وقۋشىسىن زورلادى دەپ ايىپتالعان ءتورت جىگىت اقتالىپ شىقتى. وقيعا 2024 جىلعى 8 قازاندا بولعان، دەپ حابارلايدى Dalanews.kz Batyr Jamal-عا سىلتەمە جاساپ.

وقيعا قالاي بولعان؟

سول كۇنى ارۋجان (اتى وزگەرتىلگەن) جاتتىعۋدان جاياۋ قايتىپ كەلە جاتقاندا، قاسىنا ىشىندە ءتورت جىگىتى بار كولىك توقتاعان. ولاردىڭ جاسى 18 بەن 23 ارالىعىندا بولعان. جىگىتتەردىڭ ءبىرى ءوزىن قىزدىڭ سول كەزدە اسكەردە جۇرگەن اعاسىنىڭ دوسىمىن دەپ تانىستىرسا، ەكىنشىسىن ارۋجان بۇرىننان بىلەتىن، ولار ءبىر مەكتەپتە وقىعان.

جىگىتتەر كەشكى ۋاقىت قاراڭعى ەكەنىن ايتىپ، قىزدى ۇيىنە جەتكىزىپ سالۋدى ۇسىنعان. جولاي كولىك باسقا باعىتقا بۇرىلعاندا، ارۋجاندى «الدىمەن ءبىر دوسىمىزدى ۇيىنە اپارىپ كەلەيىك» دەپ تىنىشتاندىرعان.

الايدا ولار قىزدى ەلسىز جەرگە اپارىپ، زورلاعان. كەيىن ارۋجاندى بۇكىل وتباسىنا زيان كەلتىرەمىز دەپ قورقىتىپ، تۇسىرىلگەن ۆيدەومەن بوپسالاعان.

قورقىنىش پەن ۇنسىزدىك

قورقىپ قالعان قىز ۇزاق ۋاقىت بويى ەشكىمگە ءتىس جارماعان. تۋىستارى ونىڭ مىنەز-قۇلقىنداعى وزگەرىستى بايقاعانىمەن، مۇنى ۇبت الدىنداعى كۇيزەلىس دەپ ويلاعان. شىندىق تەك 17 قازاندا، سىنىپ جەتەكشىسى ارۋجاننىڭ اۋىرسىنۋدى باساتىن دارىلەردى شامادان تىس ءىشىپ جۇرگەنىن اناسىنا ايتقاننان كەيىن بەلگىلى بولعان.

ۇيدە اناسى «كەتانوۆ» ءدارىسىنىڭ بوس قاپتامالارىن تاۋىپ الادى. العاشىندا قىزىنىڭ اسقازانىندا كىنارات بار دەپ ويلاپ، دارىگەرگە اپارماق بولعاندا، ارۋجان ءبارىن ايتىپ بەرگەن.

دالەلدەردىڭ جوعالۋى جانە تەرگەۋ

تۋىستارى وقيعا بولعان جەر ماڭىنداعى دۇكەننەن بەينەباقىلاۋ جازبالارىن الۋعا تىرىسقان. الايدا بەينەلەر ءبىر تاۋلىك قانا ساقتالاتىندىقتان، ول كەزدە جازبالار ءوشىپ كەتكەن.

وتباسى بىردەن پوليسياعا جۇگىنگەن. الايدا جابىرلەنۋشى تاراپتىڭ اناسىنىڭ ايتۋىنشا، تەرگەۋ مەن سوت ادەيى سوزىلعان. تەرگەۋ تەك 2025 جىلدىڭ شىلدەسىندە اياقتالىپ، سوت پروسەسى وتكەن جىلدىڭ قىركۇيەگىندە عانا باستالعان.

وسى ۋاقىت ىشىندە اۋىل ىشىندە ءتۇرلى قاۋەسەتتەر تاراپ، ءىستىڭ ءمان-جايى جۇرت اراسىندا تالقىلانعان. قوعامدىق قىسىمعا شىداماعان قىز ەكى رەت وزىنە قول جۇمساۋعا ارەكەتتەنگەن.

سوتتاعى داۋلى تۇستار

تۋىستارى ءىس بويىنشا بۇلتارتپاس دالەلدەر بولعانىن ايتادى. ولاردىڭ قاتارىندا دارىگەرلەردىڭ قورىتىندىسى، بيولوگيالىق ساراپتاما ناتيجەلەرى جانە كۇدىكتىلەردىڭ ءبىرىنىڭ باستاپقىدا بەرگەن مويىنداۋ جاۋابى بار. الايدا ول كەيىن بۇل سوزىنەن باس تارتقان.

سونىمەن قاتار، جابىرلەنۋشى جاقتىڭ ايتۋىنشا، ايىپتالۋشىلاردىڭ ءبىرىنىڭ تەلەفونىنان وزگە قىزدى زورلاۋ ءساتى تۇسىرىلگەن ۆيدەو تابىلعان. ءبىراق سۋديا بۇل ماتەريالدى ىسكە قوسپاعان.

سوت-مەديسينالىق ساراپتاما دەنە جاراقاتتارى تىركەلگەنىنە قاراماستان، جىنىستىق قاتىناستىڭ كۇش قولدانۋ ارقىلى بولعانىن دالەلدەيتىن ايعاق جەتكىلىكسىز دەگەن قورىتىندى جاساعان.

اپەللياسيا

ايىپتالۋشىلاردى اقتاۋ تۋرالى ۇكىم 29 قاڭتاردا شىققان. ارۋجاننىڭ تۋىستارى بۇل شەشىمدى ادىلەتسىز دەپ ساناپ، الماتى وبلىستىق سوتىنا اپەللياسيالىق شاعىم ءتۇسىردى.