– Ákimshilik-aýmaqtyq ózgerister memlekettik basqarý protsesin ońtailandyrady, azamattardyń oblys ortalyǵyna baryp-qaitýyn jeńildetedi, ishki kóshi-qon máselesin retteýge septigin tigizedi. Eki óńirdiń damýyna qýatty serpin beredi, – dep atap ótti Qanat Bozymbaev.
Oblys ákiminiń aitýynsha, mańyzy bar ákimshilik-aýmaqtyq birlikterdiń jańa shekaralary jáne basqa da geografiialyq derekter kórsetilgen shemalyq karta daiyndalyp, Qapshaǵai qalasynyń jańa bas jospary men egjei-tegjeili josparlaý jobasy ázirlenýde.
Ekonomikalyq esepteýler jasalyp, Almaty jáne Jetisý óńirleriniń áleýmettik-ekonomikalyq damýy boiynsha taldaý materialdary daiyndaldy. Qoldanystaǵy shtat sanyn qaita bólý jáne memlekettik organdardy ornalastyrý úshin obektilerdi aiqyndaý jumystary bastaldy.
Kóshýge bailanysty shyǵyndardy, sonyń ishinde qyzmettik úi-jailardy jaldaý, kóterme járdemaqy tóleý, qyzmetkerler men olardyń otbasy músheleri úshin turǵyn úi jaldaý jáne basqa da shyǵyndardy qarjylandyrýdaǵy birqatar problemalyq máseleler de aityldy. Osyǵan bailanysty esepteýler júrgizilýde, respýblikalyq biýdjetten qarajat bólý úshin biýdjettik ótinim beriletin bolady.
Sessiia barysynda sóz alǵan depýtattar bir aýyzdan oblystardy bólý týraly Prezident bastamasyn qoldap, bul qos óńirdiń de tiimdi damýyna múmkindik beretinin aitty.
Jalpy Almaty oblysynda sońǵy 20 jylda jalpy óńirlik ónim kólemi 25 ese, ónerkásip ónimi 17 ese, aýyl sharýashylyǵynyń jalpy ónimi 16 ese, qurylys jumystary 30 ese, saýda 27 ese ósken. 20 jyl ishinde 13 mln sharshy metrden astam turǵyn úi paidalanýǵa berilip, oblys ekonomikasyna 7,2 trln teńge investitsiia tartyldy, oblys biýdjeti 2001 jyly 21 mlrd teńgeden 2021 jyly 830 mlrd teńgege deiin ósken.
