– اكىمشىلىك-اۋماقتىق وزگەرىستەر مەملەكەتتىك باسقارۋ پروسەسىن وڭتايلاندىرادى، ازاماتتاردىڭ وبلىس ورتالىعىنا بارىپ-قايتۋىن جەڭىلدەتەدى، ىشكى كوشى-قون ماسەلەسىن رەتتەۋگە سەپتىگىن تيگىزەدى. ەكى ءوڭىردىڭ دامۋىنا قۋاتتى سەرپىن بەرەدى، – دەپ اتاپ ءوتتى قانات بوزىمبايەۆ.
وبلىس اكىمىنىڭ ايتۋىنشا، ماڭىزى بار اكىمشىلىك-اۋماقتىق بىرلىكتەردىڭ جاڭا شەكارالارى جانە باسقا دا گەوگرافيالىق دەرەكتەر كورسەتىلگەن سحەمالىق كارتا دايىندالىپ، قاپشاعاي قالاسىنىڭ جاڭا باس جوسپارى مەن ەگجەي-تەگجەيلى جوسپارلاۋ جوباسى ازىرلەنۋدە.
ەكونوميكالىق ەسەپتەۋلەر جاسالىپ، الماتى جانە جەتىسۋ وڭىرلەرىنىڭ الەۋمەتتىك-ەكونوميكالىق دامۋى بويىنشا تالداۋ ماتەريالدارى دايىندالدى. قولدانىستاعى شتات سانىن قايتا ءبولۋ جانە مەملەكەتتىك ورگانداردى ورنالاستىرۋ ءۇشىن وبەكتىلەردى ايقىنداۋ جۇمىستارى باستالدى.
كوشۋگە بايلانىستى شىعىنداردى، سونىڭ ىشىندە قىزمەتتىك ءۇي-جايلاردى جالداۋ، كوتەرمە جاردەماقى تولەۋ، قىزمەتكەرلەر مەن ولاردىڭ وتباسى مۇشەلەرى ءۇشىن تۇرعىن ءۇي جالداۋ جانە باسقا دا شىعىنداردى قارجىلاندىرۋداعى ءبىرقاتار پروبلەمالىق ماسەلەلەر دە ايتىلدى. وسىعان بايلانىستى ەسەپتەۋلەر جۇرگىزىلۋدە، رەسپۋبليكالىق بيۋدجەتتەن قاراجات ءبولۋ ءۇشىن بيۋدجەتتىك ءوتىنىم بەرىلەتىن بولادى.
سەسسيا بارىسىندا ءسوز العان دەپۋتاتتار ءبىر اۋىزدان وبلىستاردى ءبولۋ تۋرالى پرەزيدەنت باستاماسىن قولداپ، بۇل قوس ءوڭىردىڭ دە ءتيىمدى دامۋىنا مۇمكىندىك بەرەتىنىن ايتتى.
جالپى الماتى وبلىسىندا سوڭعى 20 جىلدا جالپى وڭىرلىك ءونىم كولەمى 25 ەسە، ونەركاسىپ ءونىمى 17 ەسە، اۋىل شارۋاشىلىعىنىڭ جالپى ءونىمى 16 ەسە، قۇرىلىس جۇمىستارى 30 ەسە، ساۋدا 27 ەسە وسكەن. 20 جىل ىشىندە 13 ملن شارشى مەتردەن استام تۇرعىن ءۇي پايدالانۋعا بەرىلىپ، وبلىس ەكونوميكاسىنا 7،2 ترلن تەڭگە ينۆەستيسيا تارتىلدى، وبلىس بيۋدجەتى 2001 جىلى 21 ملرد تەڭگەدەن 2021 جىلى 830 ملرد تەڭگەگە دەيىن وسكەن.
