Almaty oblysy, Talǵar aýdanyna qarasty Besaǵash aýylynda aldyn ala qoiylǵan tirek qabyrǵa turǵyndardy topyraq kóshkininen aman saqtap qaldy.
Oryndy jasalǵan qadam men ońdy sheshimder syn saǵatta óziniń ómirsheń qýatyn áigileitini bar. Sol úshin de qaýip pen qaterdi aldyn ala baǵamdai bilýdiń mańyzy asa zor ekeni aitpasa da túsinikti. Kezinde jasalǵan saqtyq sharasy aityp kelmes apatty aýyzdyqtaýǵa úlken múmkindik berdi.
2 mamyr kúni saǵat 11:20-da aýa raiynyń jii qubylýyna bailanysty Talǵar aýdany Besaǵash aýyly Baianaýyl kóshesindegi №8 «Býrabai» kottedj qalashyǵyna taý baýraiynan kólemi shamamen 30 tekshe metr topyraq kóshkini tústi. Alaida jergilikti apattan eshkim zardap shekken joq. Óitkeni, «Býrabai» kottedj qalashyǵy Baianaýyl kóshesindegi №16 úidiń turǵyndaryn kóshkinnen qorǵaý maqsatynda 2021 jyly biiktigi 4 metr jáne uzyndyǵy 144 metr tirek qabyrǵa salynǵan edi. Osy tirek qabyrǵa topyraq kóshkinine tosqaýyl boldy. Osylaisha, úiler búlinbedi, adamdar zardap shekken joq.
Atalmysh úide 80-ge jýyq adam turady. Jylyna eki ret kóshkin qaýpi bar kezeńde «Qazseldenqorǵaý» MM mamandary qaýipti ýchaske turǵyndaryna kóshkinniń bolý qaýpi týraly habarlama jiberedi. Qazirgi ýaqytta tirek qabyrǵasyn uzartý jáne taýdy kaskadty kesý arqyly taý massivin jeńildetý boiynsha jumystar júrgizilýde. Qulaǵan topyraqty shyǵarý der kezinde júzege asyrylýda. Apat aýmaǵynda «Qazseldenqorǵaý» MM, Tótenshe jaǵdailar departamenti jáne «Qazgidrospetsstroi» JShS qyzmetkerleri, basqa da qajetti mamandar jumyla jumys isteýde. Alda qaýipti seiiltýge baǵytalǵan jumys óz jalǵasyn tappaq.
Eske sala ketsek, ótken aida atalǵan kóshedegi jotanyń ústine salynǵan úi kóshkin saldarynan qiraǵan bolatyn.
