الماتى وبلىسى، تالعار اۋدانىنا قاراستى بەساعاش اۋىلىندا الدىن الا قويىلعان تىرەك قابىرعا تۇرعىنداردى توپىراق كوشكىنىنەن امان ساقتاپ قالدى.
ورىندى جاسالعان قادام مەن وڭدى شەشىمدەر سىن ساعاتتا ءوزىنىڭ ومىرشەڭ قۋاتىن ايگىلەيتىنى بار. سول ءۇشىن دە ءقاۋىپ پەن قاتەردى الدىن الا باعامداي ءبىلۋدىڭ ماڭىزى اسا زور ەكەنى ايتپاسا دا تۇسىنىكتى. كەزىندە جاسالعان ساقتىق شاراسى ايتىپ كەلمەس اپاتتى اۋىزدىقتاۋعا ۇلكەن مۇمكىندىك بەردى.
2 مامىر كۇنى ساعات 11:20-دا اۋا رايىنىڭ ءجيى قۇبىلۋىنا بايلانىستى تالعار اۋدانى بەساعاش اۋىلى باياناۋىل كوشەسىندەگى №8 «بۋراباي» كوتتەدج قالاشىعىنا تاۋ باۋرايىنان كولەمى شامامەن 30 تەكشە مەتر توپىراق كوشكىنى ءتۇستى. الايدا جەرگىلىكتى اپاتتان ەشكىم زارداپ شەككەن جوق. ويتكەنى، «بۋراباي» كوتتەدج قالاشىعى باياناۋىل كوشەسىندەگى №16 ءۇيدىڭ تۇرعىندارىن كوشكىننەن قورعاۋ ماقساتىندا 2021 جىلى بيىكتىگى 4 مەتر جانە ۇزىندىعى 144 مەتر تىرەك قابىرعا سالىنعان ەدى. وسى تىرەك قابىرعا توپىراق كوشكىنىنە توسقاۋىل بولدى. وسىلايشا، ۇيلەر بۇلىنبەدى، ادامدار زارداپ شەككەن جوق.
اتالمىش ۇيدە 80-گە جۋىق ادام تۇرادى. جىلىنا ەكى رەت كوشكىن ءقاۋپى بار كەزەڭدە «قازسەلدەنقورعاۋ» مم ماماندارى ءقاۋىپتى ۋچاسكە تۇرعىندارىنا كوشكىننىڭ بولۋ ءقاۋپى تۋرالى حابارلاما جىبەرەدى. قازىرگى ۋاقىتتا تىرەك قابىرعاسىن ۇزارتۋ جانە تاۋدى كاسكادتى كەسۋ ارقىلى تاۋ ءماسسيۆىن جەڭىلدەتۋ بويىنشا جۇمىستار جۇرگىزىلۋدە. قۇلاعان توپىراقتى شىعارۋ دەر كەزىندە جۇزەگە اسىرىلۋدا. اپات اۋماعىندا «قازسەلدەنقورعاۋ» مم، توتەنشە جاعدايلار دەپارتامەنتى جانە «قازگيدروسپەسستروي» ج ش س قىزمەتكەرلەرى، باسقا دا قاجەتتى ماماندار جۇمىلا جۇمىس ىستەۋدە. الدا ءقاۋىپتى سەيىلتۋگە باعىتالعان جۇمىس ءوز جالعاسىن تاپپاق.
ەسكە سالا كەتسەك، وتكەن ايدا اتالعان كوشەدەگى جوتانىڭ ۇستىنە سالىنعان ءۇي كوشكىن سالدارىنان قيراعان بولاتىن.
