Almaty metrosy: jumysshylardy kim qýdalap jatyr?
Metroda sońǵy eki-úsh jyl boiy tynyshtyq joq. Basshylyq men jumysshylar mekemeni bertinge deiin basqarǵan Murat Ókshebaev jemqorlyqpen ustalyp, qyzmetinen ketkeli syiyspai-aq qoidy.
Mysaly, osydan eki jyl buryn Metropolitenniń 200 qyzmetkeri ózderiniń aitýlarynsha «ákimshilik taǵaiyndaǵan» Qydyral Bekasylov ailyqty 25 paiyzǵa qysqartqanyn jáne operator men kassirleri shetinen jumystan shyǵaryp jatqanyn aitqan.
Aryzǵa qaraǵanda, Metropoliten basshysynyń oryntaǵyna jaiǵasa sala, Qydyral Bekasylov kiriske, naqtyraq aitsaq, jetonǵa jaýapty bólimdi qýdalai bastaǵan. Jańa basshy kele sala jetonǵa jaýapty bólimti «sender jetondy satasyńdar, sonyń aqshasyn ózara bólisesińder!» dep aiyptapty.
Alaida artynsha buǵan qatysty pikir bildirgen Bekasylov óziniń bulai beker etpegenin, budan buryn jeton bóliminiń bylyqtary áshkere bolǵanyn aitqan edi...
Aryzdanǵan metro qyzmetkerleriniń aitýynsha Qydyral Bekasylov metropolitenniń bas injeneri Aidyn Orazhanovpen birge ujymnyń ishinde «terror» uiymdastyrǵan. «Aidyn Orazhanov bul jaǵynan tipti basshysynan da asyp tústi» degen edi jumysshylar. Bas injener bolǵanyna basy ainalǵan Orazhanov jumysshylardy tútip jegen eken.
Bir qyzyǵy, budan keiin onyń ornyna kelgen Qaýyt Musabekovte óz ornynda uzaq aialdaǵan joq. Metro qyzmetkerleriniń shaǵymynan keiin óz erkimen jumystan ketti. Munda da aryz jazylǵan. «Musabekov metroǵa óziniń týǵan-týysqandaryn tyqpalady» degen edi mekeme jumysshylary.
Musabekovtyń keiin onyń ornyna bir kezderi Bekasylovtyń oń qoly bolǵan Aidyn Orazhanov taǵaiyndalady (2014 jyly). Biraq, baiqaýymyzsha, oǵan da tyqyr taiap qalǵan siiaqty.
Taiaýda Metropolitenniń birqatar qyzmetkerleri Almaty ákimi Baýyrjan Baibektiń atyna aryz jazdy. Aryzda «bizdi jappai jumystan shyǵarýda, onyń ústine kollektivtegi ahýal da aýyrlap barady» delingen. Ázir atalǵan aryzǵa bailanysty metroda tekserý júrip jatyr.
Jumysshylardyń aitýynsha, bul joly bas injenerlikten Metropoliten qyzmetiniń basshysy qyzmetine kóterilgen Orazhanov kele sala jappai jumystan shyǵarý naýqanyn bastap ketipti.
Bir ǵana 2015 jyly 213 adam jumystan shyǵarylǵan. Biylǵy jyldyń naýryzyna deiingi úsh aidyń ishinde taǵy 40 adam qyzmetinen ketken... Metropoliten qyzmetkerleri bolsa «bul qýdalaýdyń basy ǵana» deidi.
Basshynyń ózi bárin joqqa shyǵaryp otyr. Orazhanovtyń aitýyna qaraǵanda, munyń bári jala. Byltyrǵy jyly óz erkimen tek 5 adam ǵana jumystan ketken.
Atalǵan isti nazarǵa alǵan Almaty qalalyq ákimshiligi men basqa da quzyrly organdardan ázir jaýap joq. Bilsek, tekserý jumystary áli júrip jatyr.
Aidyn Orazhanovtyń 200-den asa adamdy zańsyz jumystan shyǵarǵany dáleldense, endeshe metro basshysy «daǵdarys tusynda kásiporyndardan jumysshylardyń ornyn saqtap qalýdy» suraǵan Prezidenttiń sózine qaishy kelip otyrǵany anyq...
