مەترودا سوڭعى ەكى-ۇش جىل بويى تىنىشتىق جوق. باسشىلىق مەن جۇمىسشىلار مەكەمەنى بەرتىنگە دەيىن باسقارعان مۇرات وكشەبايەۆ جەمقورلىقپەن ۇستالىپ، قىزمەتىنەن كەتكەلى سىيىسپاي-اق قويدى.
مىسالى، وسىدان ەكى جىل بۇرىن مەتروپوليتەننىڭ 200 قىزمەتكەرى وزدەرىنىڭ ايتۋلارىنشا «اكىمشىلىك تاعايىنداعان» قىدىرال بەكاسىلوۆ ايلىقتى 25 پايىزعا قىسقارتقانىن جانە وپەراتور مەن كاسسيرلەرى شەتىنەن جۇمىستان شىعارىپ جاتقانىن ايتقان.
ارىزعا قاراعاندا، مەتروپوليتەن باسشىسىنىڭ ورىنتاعىنا جايعاسا سالا، قىدىرال بەكاسىلوۆ كىرىسكە، ناقتىراق ايتساق، جەتونعا جاۋاپتى ءبولىمدى قۋدالاي باستاعان. جاڭا باسشى كەلە سالا جەتونعا جاۋاپتى ءبولىمتى «سەندەر جەتوندى ساتاسىڭدار، سونىڭ اقشاسىن ءوزارا بولىسەسىڭدەر!» دەپ ايىپتاپتى.
الايدا ارتىنشا بۇعان قاتىستى پىكىر بىلدىرگەن بەكاسىلوۆ ءوزىنىڭ بۇلاي بەكەر ەتپەگەنىن، بۇدان بۇرىن جەتون ءبولىمىنىڭ بىلىقتارى اشكەرە بولعانىن ايتقان ەدى...
ارىزدانعان مەترو قىزمەتكەرلەرىنىڭ ايتۋىنشا قىدىرال بەكاسىلوۆ مەتروپوليتەننىڭ باس ينجەنەرى ايدىن ورازحانوۆپەن بىرگە ۇجىمنىڭ ىشىندە «تەررور» ۇيىمداستىرعان. «ايدىن ورازحانوۆ بۇل جاعىنان ءتىپتى باسشىسىنان دا اسىپ ءتۇستى» دەگەن ەدى جۇمىسشىلار. باس ينجەنەر بولعانىنا باسى اينالعان ورازحانوۆ جۇمىسشىلاردى ءتۇتىپ جەگەن ەكەن.
ءبىر قىزىعى، بۇدان كەيىن ونىڭ ورنىنا كەلگەن قاۋىت مۇسابەكوۆتە ءوز ورنىندا ۇزاق ايالداعان جوق. مەترو قىزمەتكەرلەرىنىڭ شاعىمىنان كەيىن ءوز ەركىمەن جۇمىستان كەتتى. مۇندا دا ارىز جازىلعان. «مۇسابەكوۆ مەتروعا ءوزىنىڭ تۋعان-تۋىسقاندارىن تىقپالادى» دەگەن ەدى مەكەمە جۇمىسشىلارى.
مۇسابەكوۆتىڭ كەيىن ونىڭ ورنىنا ءبىر كەزدەرى بەكاسىلوۆتىڭ وڭ قولى بولعان ايدىن ورازحانوۆ تاعايىندالادى (2014 جىلى). ءبىراق، بايقاۋىمىزشا، وعان دا تىقىر تاياپ قالعان سياقتى.
تاياۋدا مەتروپوليتەننىڭ ءبىرقاتار قىزمەتكەرلەرى الماتى اكىمى باۋىرجان بايبەكتىڭ اتىنا ارىز جازدى. ارىزدا «ءبىزدى جاپپاي جۇمىستان شىعارۋدا، ونىڭ ۇستىنە كوللەكتيۆتەگى احۋال دا اۋىرلاپ بارادى» دەلىنگەن. ءازىر اتالعان ارىزعا بايلانىستى مەترودا تەكسەرۋ ءجۇرىپ جاتىر.
جۇمىسشىلاردىڭ ايتۋىنشا، بۇل جولى باس ينجەنەرلىكتەن مەتروپوليتەن قىزمەتىنىڭ باسشىسى قىزمەتىنە كوتەرىلگەن ورازحانوۆ كەلە سالا جاپپاي جۇمىستان شىعارۋ ناۋقانىن باستاپ كەتىپتى.
ءبىر عانا 2015 جىلى 213 ادام جۇمىستان شىعارىلعان. بيىلعى جىلدىڭ ناۋرىزىنا دەيىنگى ءۇش ايدىڭ ىشىندە تاعى 40 ادام قىزمەتىنەن كەتكەن... مەتروپوليتەن قىزمەتكەرلەرى بولسا «بۇل قۋدالاۋدىڭ باسى عانا» دەيدى.
باسشىنىڭ ءوزى ءبارىن جوققا شىعارىپ وتىر. ورازحانوۆتىڭ ايتۋىنا قاراعاندا، مۇنىڭ ءبارى جالا. بىلتىرعى جىلى ءوز ەركىمەن تەك 5 ادام عانا جۇمىستان كەتكەن.
اتالعان ءىستى نازارعا العان الماتى قالالىق اكىمشىلىگى مەن باسقا دا قۇزىرلى ورگانداردان ءازىر جاۋاپ جوق. بىلسەك، تەكسەرۋ جۇمىستارى ءالى ءجۇرىپ جاتىر.
ايدىن ورازحانوۆتىڭ 200-دەن اسا ادامدى زاڭسىز جۇمىستان شىعارعانى دالەلدەنسە، ەندەشە مەترو باسشىسى «داعدارىس تۇسىندا كاسىپورىنداردان جۇمىسشىلاردىڭ ورنىن ساقتاپ قالۋدى» سۇراعان پرەزيدەنتتىڭ سوزىنە قايشى كەلىپ وتىرعانى انىق...
