Almaty qalasy men Almaty oblysynda esirtkini jasyryn jolmen taratqan ınternet-dúkenniń qyzmeti áshkerelendi. Bul týraly İshki ister mınıstrliginiń baspasóz qyzmeti málimdedi, dep habarlaıdy Dalanews.kz.

Vedomstvo málimetinshe, Esirtki qylmysyna qarsy is-qımyl komıteti júrgizgen jedel-izdestirý sharalary nátıjesinde qylmystyq toptyń 11 múshesi ustalǵan. Olardyń qatarynda uıymdastyrýshylar, operatorlar jáne zańsyz tabystyń qarjylyq aınalymyn qamtamasyz etken tulǵalar bar.

Operasıa barysynda zańsyz aınalymnan shamamen 3 keli sıntetıkalyq esirtki tárkilendi. Sondaı-aq qylmystyq shemany úılestirýge paıdalanylǵan baılanys quraldary, bank kartalary men sıfrlyq tasymaldaǵyshtar alyndy.

Atalǵan derek boıynsha sotqa deıingi tergeý bastaldy. Quzyrly organdar tergeý amaldary jalǵasyp jatqanyn málimdedi.