Алматы қаласы мен Алматы облысында есірткіні жасырын жолмен таратқан интернет-дүкеннің қызметі әшкереленді. Бұл туралы Ішкі істер министрлігінің баспасөз қызметі мәлімдеді, деп хабарлайды Dalanews.kz.
Ведомство мәліметінше, Есірткі қылмысына қарсы іс-қимыл комитеті жүргізген жедел-іздестіру шаралары нәтижесінде қылмыстық топтың 11 мүшесі ұсталған. Олардың қатарында ұйымдастырушылар, операторлар және заңсыз табыстың қаржылық айналымын қамтамасыз еткен тұлғалар бар.
Операция барысында заңсыз айналымнан шамамен 3 келі синтетикалық есірткі тәркіленді. Сондай-ақ қылмыстық схеманы үйлестіруге пайдаланылған байланыс құралдары, банк карталары мен цифрлық тасымалдағыштар алынды.
Аталған дерек бойынша сотқа дейінгі тергеу басталды. Құзырлы органдар тергеу амалдары жалғасып жатқанын мәлімдеді.
