Ákimdiktiń málimetinshe, qurylys jumystaryn aiaqtap, jobany iske qosý 2024 jyldyń qarashasyna josparlanǵan. Osylaisha, Terekti yqshamaýdanynyń 7 myńnan astam turǵyny ortalyqtandyrylǵan sý jáne káriz jelilerimen qamtylatyn bolady.
Al tamyz aiynyń sońynda «Rahat-Mádeniet» yqshamaýdanynda 131,7 shaqyrymdy quraityn injenerlik jelilerdiń qurylysy bastalady. 2024 jyldyń jeltoqsan aiyna deiin jalǵasatyn qurylys jumystaryna tehnikalyq daiyndyq jumystary júrgizilýde. Joba júzege asqanda 14 myńnan astam turǵyn ortalyq sý jáne káriz jelilerimen qamtylady.
– Jumysqa tapsyrys berýshiler retinde biz jumys aiaqtalǵan kezde aqaýlardyń aldyn alý úshin syǵylmaityn topyraqpen toltyrýdy, al buryn asfalttalǵan kóshelerdi, joldy qalpyna keltirýdi qarastyrdyq. Jelilerdiń qurylysy aiaqtalǵansha jol-qurylys jumystary júrgiziletin bolady. Sonyń saldarynan kólik qozǵalysyna ýaqytsha qolaisyzdyqtar týyndaidy. Al qurylys jumystary bizdiń turaqty baqylaýymyzda bolady, – dedi Alataý aýdanynyń ákimi Azamat Qaldybekov.
Aýdan ákimi Alataý aýdany Almaty qalasyna qosylǵanǵa deiin jeke turǵyn úi qurylystary ortalyq káriz júiesisiz salynǵanyn alǵa tartty. Jeke sektordaǵy aǵyndy sýlar aýlalarda ornalasqan septikterge quiylyp, topyraq pen jer asty sýlaryn lastap kelgen. Jańa injenerlik jeliler iske qosylǵannan keiin bul qiyndyqtardyń bári artta qalatyn bolady.
– Aýdanymyzdaǵy kei jerlerde jer asty sýlary úzdiksiz jer betine shyǵady. Osy ózekti máseleni sheshý úshin 2023 jyly respýblikalyq biýdjetten káriz jelilerin tartýǵa qarajat bólingen bolatyn. Joba ázirlenip, qazir júzege asyrylýda. Jeke sektorda jańa jelilerdi tartý isi – qala biligi airyqsha kóńil bólip otyr, – dep qosty Azamat Qaldybekov.
