Áleýmettik jelide shalǵaidaǵy aýyl emes, naq Almatyda otyryp, balshyqqa belshesinen batqan jurttyń videosy paida bolyp, kóp qaralym jinaýda. Bul videodaǵy úndeý qala ákimi Erbolat Dosaev pen Alataý aýdanynyń ákimi Talǵat Malybaevqa joldanǵan, dep habarlaidy Dalanews.kz.
Ásirese, búginderi bala-shaǵasymen belýardan batpaq keship júrgen Boraldai yqsham aýdanynyń turǵyndary taǵaiyndalǵanyna 7-8 ai bolǵan aýdan ákimi Talǵat Malybaevqa degen ókpesi qara qazandai. "Mine, balamnyń kiimi, kózińizben kórińiz" dep balshyqqa bókken oqýshy kýrtkasyn, sómkesin, tipti aiaq-kiimin de videoda kórsetken jergilikti áiel:
"Osy rette ákim Talǵat Malybaevqa qoiǵymyz keletin suraq bar: Siz jáne komandańyz nemen ainalysyp jatyrsyzdar, óz basqarýyńyzdaǵy aimaq turǵyndarynyń qalai ómir súrip jatqanynan, qandai joldarmen júrip júrgeninen habardaryńyz bar ma? Jalpy, Boraldai yqsham aýdanyna at basyn burý oiyńyzda bar ma? Halyq ta Sizdi asyǵa kútip otyr Myna turǵyndardyń jan aiqaiyna qulaq asatyn kez keldi emes pe", - deidi ashyna.
Jergilikti turǵyndardyń aitýynsha, bul joldar bastapqyda jap-jaqsy bolǵan. Onda da jergilikti bilikten qaiyr bolmaǵan soń óz qaltalarynan aqsha shyǵaryp, qum-topyraq tóktirip tegistep alǵan. Alaida kóp onyń qyzyǵyn kórip úlgermepti. Naqtyraq aitsaq, bul múmkindikten aiyrǵan osy eldimekendi ary-beri oiqastai damylsyz basyp ótetin bóten júk kólikteri kórinedi.
Videoda Alaman, Osmanova, Ǵalymbaeva jáne Arshyn kósheleriniń adam kórgisiz beinesi sipattalady.
"Meshittiń janyndaǵy myna shuńqyrdy kómetin bireý bar ma? Syrttan kelgen biik kólikterdiń ózi túsip ketip, shyǵa almai jatyr myna arada. Adam túgili munda kólikterdiń júrýi qiyn. Aidalaǵa tastap ketemiz kólikti. Al jedel járdemdi shaqyrsaq, munda kire qoiýy ekitalai", - deidi saly sýǵa ketken jergilikti turǵyndardyń biri.
Óz kezegimizde biz de bul videony nazarǵa alyp, qiynshylyqqa tap kelip otyrǵan qarashanyń únin jetkizýdi jón kórip otyrmyz. Sondyqtan atalǵan máselege qatysty qala jáne aýdan ákimderi tarapynan qandai da bir reaktsiia bolady dep kútemiz.
