الەۋمەتتىك جەلىدە شالعايداعى اۋىل ەمەس، ناق الماتىدا وتىرىپ، بالشىققا بەلشەسىنەن باتقان جۇرتتىڭ ۆيدەوسى پايدا بولىپ، كوپ قارالىم جيناۋدا. بۇل ۆيدەوداعى ۇندەۋ قالا اكىمى ەربولات دوسايەۆ پەن الاتاۋ اۋدانىنىڭ اكىمى تالعات مالىبايەۆقا جولدانعان، دەپ حابارلايدى Dalanews.kz.
اسىرەسە، بۇگىندەرى بالا-شاعاسىمەن بەلۋاردان باتپاق كەشىپ جۇرگەن بورالداي ىقشام اۋدانىنىڭ تۇرعىندارى تاعايىندالعانىنا 7-8 اي بولعان اۋدان اكىمى تالعات مالىبايەۆقا دەگەن وكپەسى قارا قازانداي. "مىنە، بالامنىڭ كيىمى، كوزىڭىزبەن كورىڭىز" دەپ بالشىققا بوككەن وقۋشى كۋرتكاسىن، سومكەسىن، ءتىپتى اياق-كيىمىن دە ۆيدەودا كورسەتكەن جەرگىلىكتى ايەل:
"وسى رەتتە اكىم تالعات مالىبايەۆقا قويعىمىز كەلەتىن سۇراق بار: ءسىز جانە كومانداڭىز نەمەن اينالىسىپ جاتىرسىزدار، ءوز باسقارۋىڭىزداعى ايماق تۇرعىندارىنىڭ قالاي ءومىر ءسۇرىپ جاتقانىنان، قانداي جولدارمەن ءجۇرىپ جۇرگەنىنەن حاباردارىڭىز بار ما؟ جالپى، بورالداي ىقشام اۋدانىنا ات باسىن بۇرۋ ويىڭىزدا بار ما؟ حالىق تا ءسىزدى اسىعا كۇتىپ وتىر مىنا تۇرعىنداردىڭ جان ايقايىنا قۇلاق اساتىن كەز كەلدى ەمەس پە"، - دەيدى اشىنا.
جەرگىلىكتى تۇرعىنداردىڭ ايتۋىنشا، بۇل جولدار باستاپقىدا جاپ-جاقسى بولعان. وندا دا جەرگىلىكتى بيلىكتەن قايىر بولماعان سوڭ ءوز قالتالارىنان اقشا شىعارىپ، قۇم-توپىراق توكتىرىپ تەگىستەپ العان. الايدا كوپ ونىڭ قىزىعىن كورىپ ۇلگەرمەپتى. ناقتىراق ايتساق، بۇل مۇمكىندىكتەن ايىرعان وسى ەلدىمەكەندى ارى-بەرى ويقاستاي دامىلسىز باسىپ وتەتىن بوتەن جۇك كولىكتەرى كورىنەدى.
ۆيدەودا الامان، وسمانوۆا، عالىمبايەۆا جانە ارشىن كوشەلەرىنىڭ ادام كورگىسىز بەينەسى سيپاتتالادى.
"مەشىتتىڭ جانىنداعى مىنا شۇڭقىردى كومەتىن بىرەۋ بار ما؟ سىرتتان كەلگەن بيىك كولىكتەردىڭ ءوزى ءتۇسىپ كەتىپ، شىعا الماي جاتىر مىنا ارادا. ادام تۇگىلى مۇندا كولىكتەردىڭ ءجۇرۋى قيىن. ايدالاعا تاستاپ كەتەمىز كولىكتى. ال جەدەل جاردەمدى شاقىرساق، مۇندا كىرە قويۋى ەكىتالاي"، - دەيدى سالى سۋعا كەتكەن جەرگىلىكتى تۇرعىنداردىڭ ءبىرى.
ءوز كەزەگىمىزدە ءبىز دە بۇل ۆيدەونى نازارعا الىپ، قيىنشىلىققا تاپ كەلىپ وتىرعان قاراشانىڭ ءۇنىن جەتكىزۋدى ءجون كورىپ وتىرمىز. سوندىقتان اتالعان ماسەلەگە قاتىستى قالا جانە اۋدان اكىمدەرى تاراپىنان قانداي دا ءبىر رەاكسيا بولادى دەپ كۇتەمىز.
