90-jyldary mundai kúrdeli mamandar daiarlaityn oqý oryndardyń materialdyq bazasyn jańartý – eń ózekti máselelerdiń biri boldy. Biraq elimizdiń ekonomikalyq áleýeti artqaly bul baǵyttaǵy máseleler birtindep sheshilip keledi. Bul jaiynda taiaýda jańa oqý-jattyǵý zaly men jańa ushaqtar parkiniń ashylý saltanatynda Azamattyq aviatsiia akademiiasynyń rektory Muhtar Baijumanov bylai dep oiyn ortaǵa saldy:
– Búginde bizder akademiia tarihyndaǵy jarqyn sátke kýá bolyp otyrmyz. Oqý oryn jańa oqý ushaqtary men sapaly nusqaýshy quramy, qazirgi zamanǵa sai zamanaýi trenajer, halyqaralyq standart boiynsha ushqyshtardy daiyndaityn jańa oqý ortalyǵynyń tusaýyn kesip otyr. Memleket basshysy Nursultan Nazarbaev 100 naqty qadamda 5 institýtsionaldy reformanyń oryndalýy úshin básekege qabiletti mamandardy daiyndaýdy jetildirý qajettiligin, ushý qaýipsizdigi men áýetasymaldaýdy memlekettik retteý tiimdiligin jaqsartýdy erekshe atap ótken edi. Búgin biz sol alǵa qoiǵan maqsattyń oryndalyp otyrǵanyna kýá bolyp otyrmyz, – degen bolatyn.
Elimizde aviatsiia mamandaryn daiarlaityn jalǵyz oqý orny Azamattyq aviatsiia akademiiasynyń túlekteri 10 italiialyq ushaǵy men 2 zamanaýi Airbus jáne Boeing trenajerlerine ie boldy. Boraldai aerodromynda akademiia basshylyǵy 10 italiialyq Tecnam markaly oqý ushaqtaryn kópshilikke tanystyrdy. Endi akademiia kýrsanttary eýropalyq mamandar biligin shyńdap júrgen áýekemelerin paidalanatyn bolady. Al jańa trenajerler bolashaq ushqyshtarǵa jer men áýedegi túrli jaǵdailarda qalai durys áreket etý kerektigin úirenýge kómegin tigizbek.
Jýrnalister qaýymyna jańa trenajerlerdi tanystyrǵan Azamattyq aviatsiia akademiiasynyń bólim meńgerýshisi Baýyrjan Kórpeshov:
– Trenajerge otyrǵan kezde ushaqta qandai qimyl-qozǵalys bolatynyn tolyqtai sezinýge bolady. Kóterilgeni, quldilaǵany, burylǵanyn – bárin shynaiy ómirdegidei bastan keshesiz. Qalai ushtyń, qaida buryldyń, qandai jyldamdyqta júrdiń, biiktigiń qansha – osynyń bárin karta eseptep beredi. Sol boiynsha qandai qatelik ketti, sony túzeýge qaitadan múmkindigi bolady, – deidi.
Qazirgi tańda atalmysh oqý ornynan túlep ushqan talai túlekter, elimizdi aitpaǵan kúnde, dúniejúziniń birqatar elderinde áýe kemelerin tizgindep, kók aspanda samǵap júr. Jerimiz keń bolǵan saiyn áýe salasyn damytýdyń qanshalyqty mańyzy zor ekenin túsinýge bolady. Keń baitaq elimiz shaǵyn aviatsiiany damytýǵa suranyp tur. Bul rette shaǵyn aviatsiia ózdiginen quryla salmaityny belgili. Bul baǵytta kóptegen jumystar atqarý qajet.
– Ózderińiz de bilesizder, Memleket basshysy Nursultan Nazarbaevtyń «Qazaqstan – 2050» Strategiiasynda 2013 jyldan bastap zamanaýi tehnikalyq jáne injenerlik bilim berý júiesinde halyqaralyq sertifikattarǵa ie bolǵan joǵary dárejeli mamandar daiarlaýdy tapsyrǵan bolatyn. Bul baǵyt boiynsha qazir Bilim jáne ǵylym ministrliginiń qoldaýymen jan-jaqty jumystar júrgizip jatyrmyz. Keleshekte Azamattyq aviatsiia akademiiasynyń bazasynda áýe salasyna qajetti tehnikalyq mamandardy daiarlap, olarǵa arnaiy sertifikat beredi. Qazir akademiia tikushaqty tizgindeitin mamandardy daiarlaýdy qolǵa alyp otyr. Sonymen qatar áýe kemelerine qyzmet kórsetetin bilikti tehnik mamandardy da bizdiń akademiiada túlep shyǵyp, otandyq aviatsiianyń ósip-órkendeýine óz úlesin qosyp keledi, – dedi oqý oryn basshysy.
Dýman Tanabasov
