Qazaqstanda salyq erejeleriniń qatańdaýy qurylys salasyndaǵy jeke kásipkerlerdiń jappai azaiýyna túrtki boldy. Zańnamadaǵy jańa shekteýlerge bailanysty iri developerlerge jeńildetilgen rejimdegi merdigerlermen áriptestik ornatý qarjylyq turǵydan tiimsiz bolyp otyr, dep habarlaidy Dalanews «31 arnaǵa» silteme jasap.
Sala ókilderi keltirgen málimetke sáikes, sońǵy jyl ishinde bul sektordaǵy kásipkerler sany 11%-ǵa derlik qysqarǵan. Naryqtan negizinen tapsyrystardy kelisimshartpen oryndap kelgen tar beiindi mamandar men shaǵyn brigadalar — sylaqshylar, boiaýshylar men montajdaýshylar shettep qaldy.
Buǵan qurylys kompaniialarynyń korporativtik tabys salyǵyn (KTS) esepteý kezinde «jeńildetilgen júiedegi» JK-lardyń qyzmetin burynǵydai tolyq shegerimge ustai almaýy sebep. Qazaqstan Qurylysshylar odaǵy prezidentiniń orynbasary Viacheslav Lazarevtiń sózinshe, keibir developerlerde mundai merdigerler úlesi 50%-ǵa deiin jetetin. Salyqtyq eseptiń ózgerýi qurylys-montajdaý jumystarynyń ózindik qunyn orta eseppen 10–15%-ǵa qymbattatty.
Shyǵynnyń artýy baspananyń túpkilikti qunyna da salmaq saldy: jyl basynan beri eldegi turǵyn úidiń sharshy metri 13%-dan astam qymbattady. Tyǵyryqtan shyǵý úshin sarapshylar qurylys salasyndaǵy JK-larǵa arnaiy salyq rejimin engizýdi usynyp otyr. Alaida jyljymaityn múlik jónindegi maman Aleksandr Pak bul jeńildik engizilse de baǵa tómendemeitinin, tek onyń ary qaraiǵy ósý qarqyny báseńdeýi múmkin ekenin aitady.
Sarapshylardyń boljamynsha, baspana baǵasy jyl sońyna deiin infliatsiiamen qatar ósýin jalǵastyrady.
