Ajyrasýdy qalai azaitamyz?
Mamandar dilimiz ben dástúrimizge jat desek te, “Neke kelisim shartyna” nazar aýdaratyn ýaqyt jetti” dep sanaidy. Aitýlarynsha, ol ajyrasqannan keiin qamqorlyqsyz qalatyn áielderdi qorǵaýǵa kómektesedi dep habarlaidy 31 arna.
21 jastaǵy Saltanat Sholanova osy bastan “Neke kelisim shartyn” oilastyryp júr. Aitýynsha, qazir kelinshekter úi jiyp, tamaq ázirlep, bala baǵýmen ainalysyp júrgende, er kisiler bilim alyp, jumys istep, aqsha taýyp, mánsap ósirýge tolyq qaýqarly. Bul jait jubailardyń joldary eki bólinip ketkende áielderdiń ózin-ózi asyrap, qamtamasyz etýine kedergi bolady, – deidi.
“Sizdiń kúieýińiz balańyzǵa aliment tóleidi, durys pa? Al sizdi kim asyraidy? Siz otbasyǵa qaradyńyz, belgili bir jaýapkershilikter boldy, siz de jumys jasadyńyz, sonyń bir ótemi bolýy kerek”, – deidi turǵyn Saltanat Sholanova.
Saltanattyń sózin psiholog Anna Qudiiarova da qoshtap otyr. “Neke kelisim sharty” ajyrasqannan keiin kimge ne tiesili ekenin anyqtap alýǵa múmkindik beredi. Al bul bolashaqta áielderge múliktik, materialdyq qoldaýsyz qalmaýǵa kepil bolady, – deidi ol.
“Erteń ajyrai ma, kóńil-kúii toqalǵa ketip qaldy ma, myna jaqtaǵy 4 bala, 5 bala bir adyrań qalǵandai ǵoi. Endi 1 aiǵa 10 myń teńge beredi sol. Qaltaly, aty shyqqan adam. Biraq ol ana jaqqa kotedjge, jaqsy kelinshekpen ketip jatyr. Sonda kórdińiz be, tonnyń keltesi-ai degen. Báibisheni qorǵaityn eshqandai neke kelisimi joq bolyp tur ǵoi”, – deidi psiholog Anna Qudiiarova.
Súigen jarymen birge 18 jyl tatý-tátti ómir súrip jatqan zańger Jankeldi Súleimanov neke týraly shartqa otyrǵandardyń biri. Onyń aitýynsha, keńestik zamanda jubailarda bóliserdei múlik bolmaǵan, sondyqtan bul sharttyń da qajettiligi týmaǵan. Al qazir kei dáýletti otbasylyrdyń ortaq qazynasy júzdegen milliondarǵa deiin jetedi, ony zańmen bólmesek, eki ara daýdamai jaǵa jyrtysýǵa deiin jetedi, – deidi ol.
Mamannyń aitýynsha, ata-analar ajyrasqanda balalardyń ortaq múlikke quqyǵy joq. Sondyqtan eń birinshi kezekte, shartta balalardyń sybaǵasy bólek eskerilýi kerek. Sondai-aq qoldanystaǵy múliktiń barlyǵy otbasy múshelerine tirkelýi kerek, – dep otyr.
“Záýlim úide turady, 5 kóligi bar, barshylyqta ómir súrip jatady. Al ajyrasýǵa ýaqyt taiaǵanda jyljymaityn múliktiń barlyǵy ákesiniń atynda, kólikteri kompaniia atynda, ózge zattary aǵa-inileriniń atyna aýdarylyp qoiǵan bolyp shyǵady. Áieldiń bul jaǵdaida eshteńege ielik etýge quqyǵy bolmai shyǵady”, – deidi zańger Jankeldi Súleimanov.
Taǵy bir aita keterligi, zorlyqpen, kúshtep qol qoidyrylyp alǵan, eki taraptyń quqyqtary teń eskerilmegen “Neke kelisim shartynyń” sotta eshqandai kúshi bolmaidy eken.
