Ánshi Merýert Túsipbaeva áleýmettik jelidegi synǵa jaýap berip, óz ustanymyn naqty jetkizdi, dep jazady Dalanews.kz.
Óner iesi osyǵan deiin semizdik jaily aitqan pikiri úshin keshirim suraǵanyn eske salyp, artyq salmaq densaýlyqqa ziian keltiretinin atap ótti.
Sonymen birge adamdardy bos ósekke ýaqyt joǵaltpai, sportpen ainalysyp, mańyzdy máselelerge kóńil bólýge shaqyrdy.
"Odan da halyqtyń jaǵdaiyna kóńil bólińizder! Qoǵamnyń qyzý talqysyna túsip jatqan AES-ti zertteńizder! Memleket pen halyqtyń jaǵdaiyn aityp, jyrtysyn jyrtyńdar! Soǵan kóńil bólińder!”, – dedi óner iesi.
Onyń aitýynsha, AES tek ekologiialyq qaýip qana emes, bolashaq urpaqtyń densaýlyǵyna da úlken ziian ákelýi múmkin.
"Men bolashaq urpaqtyń, balalarynyń densaýlyǵyna alańdaityn árbir azamattyń bul máselege bei-jai qaramaýy tiis dep oilaimyn", – dedi ol.
Bir qyzyǵy, sońǵy ýaqytta ánshiniń osy ustanymy úshin oǵan qarsy bottar tarapynan shabýyldar kóbeiip ketken. Áleýmettik jelilerde ánshiniń pikirin joqqa shyǵaryp, onyń ustanymyn synǵa alatyn jasandy akkaýnttardyń belsendiligi artqan. Degenmen Merýert Túsipbaeva bul shabýyldarǵa qaramastan, óz kózqarasynan taimaǵanyn kórsetti.
Onyń AES-ke qarsy málimdemesi erekshe nazar aýdartady, sebebi qazir óner adamdarynyń basym kópshiligi bul jobany qoldap otyrǵan shaqta, Túsipbaeva jalǵyz qalsa da, batyl sheshim qabyldap, bul máselege qarsy ekenin ashyq aitýǵa júregi jetti. Onyń bul áreketi kópshilik arasynda qoldaýǵa ie bolyp, óner iesiniń naǵyz azamattyq ustanymyn kórsetken erekshe qadam retinde baǵalandy.
