Memleket basshysy Qasym-Jomart Toqaev Qazaqstanda sońǵy jyldarda júzege asyrylǵan aýqymdy reformalar týraly málimdep, el damýynyń jańa baǵytyn naqtylady, dep habarlaidy Dalanews.kz.
“Sońǵy birneshe jylda Qazaqstanda aýqymdy ekonomikalyq jáne institýtsionaldyq reformalar júrgizildi. Bizdiń maqsatymyz aiqyn – barynsha ártaraptandyrylǵan, inkliýzivti jáne keleshekke baǵdarlanǵan ekonomika qurý. Ekonomikalyq ósim ornyqty bolýmen qatar, onyń igiligi ár azamatqa ádil bólinýge tiis”, — deidi ol.
Memleket basshysynyń sózinshe, “Ádiletti Qazaqstandy” qurý jolynda eleýli jumystar atqarylyp jatyr.
“Elimizdi túbegeili jańǵyrtyp, Ádiletti Qazaqstannyń negizin qalaý úshin memlekettilikti nyǵaitýǵa kóp kúsh-jiger jumsap jatyrmyz. Jalpyulttyq referendým arqyly Konstitýtsiiamyzǵa ózgeris engizilip, basty bilik institýttaryna reforma jasaldy. Biz sýperprezidenttik júieden bas tarttyq. "Kúshti Prezident – yqpaldy Parlament – esep beretin Úkimet" qaǵidasyn basshylyqqa alatyn, tejeý men tepe-teńdik júiesi bar prezidenttik respýblika jolyn tańdadyq. Bul tujyrym Qazaqstandaǵy saiasi júieniń erekshelikterine meilinshe laiyqty model ekenine kámil senemin”, — dep qosty ol.
Prezident ókilettiligi bir rettik 7 jyldyq merzimmen shekteldi. Toqaev bul sheshimdi el tarihyndaǵy buryn-sońdy bolmaǵan qadam retinde baǵalap, onyń saiasi júieni nyǵaitýǵa, ekonomikany damytýǵa jáne órkenietti qoǵam qurýǵa yqpal etetinine senim bildirdi.
“Prezident – halyqtyń belgili bir merzimge, bizdiń jaǵdaiymyzda jeti jylǵa jaldaǵan menedjeri”, — dep túiindedi ol.
