مەملەكەت باسشىسى قاسىم-جومارت توقايەۆ قازاقستاندا سوڭعى جىلداردا جۇزەگە اسىرىلعان اۋقىمدى رەفورمالار تۋرالى مالىمدەپ، ەل دامۋىنىڭ جاڭا باعىتىن ناقتىلادى، دەپ حابارلايدى Dalanews.kz.
“سوڭعى بىرنەشە جىلدا قازاقستاندا اۋقىمدى ەكونوميكالىق جانە ينستيتۋسيونالدىق رەفورمالار جۇرگىزىلدى. ءبىزدىڭ ماقساتىمىز ايقىن – بارىنشا ءارتاراپتاندىرىلعان، ينكليۋزيۆتى جانە كەلەشەككە باعدارلانعان ەكونوميكا قۇرۋ. ەكونوميكالىق ءوسىم ورنىقتى بولۋمەن قاتار، ونىڭ يگىلىگى ءار ازاماتقا ءادىل بولىنۋگە ءتيىس”، — دەيدى ول.
مەملەكەت باسشىسىنىڭ سوزىنشە، “ادىلەتتى قازاقستاندى” قۇرۋ جولىندا ەلەۋلى جۇمىستار اتقارىلىپ جاتىر.
“ەلىمىزدى تۇبەگەيلى جاڭعىرتىپ، ادىلەتتى قازاقستاننىڭ نەگىزىن قالاۋ ءۇشىن مەملەكەتتىلىكتى نىعايتۋعا كوپ كۇش-جىگەر جۇمساپ جاتىرمىز. جالپىۇلتتىق رەفەرەندۋم ارقىلى كونستيتۋسيامىزعا وزگەرىس ەنگىزىلىپ، باستى بيلىك ينستيتۋتتارىنا رەفورما جاسالدى. ءبىز سۋپەرپرەزيدەنتتىك جۇيەدەن باس تارتتىق. "كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت" قاعيداسىن باسشىلىققا الاتىن، تەجەۋ مەن تەپە-تەڭدىك جۇيەسى بار پرەزيدەنتتىك رەسپۋبليكا جولىن تاڭدادىق. بۇل تۇجىرىم قازاقستانداعى ساياسي جۇيەنىڭ ەرەكشەلىكتەرىنە مەيلىنشە لايىقتى مودەل ەكەنىنە كامىل سەنەمىن”، — دەپ قوستى ول.
پرەزيدەنت وكىلەتتىلىگى ءبىر رەتتىك 7 جىلدىق مەرزىممەن شەكتەلدى. توقايەۆ بۇل شەشىمدى ەل تاريحىنداعى بۇرىن-سوڭدى بولماعان قادام رەتىندە باعالاپ، ونىڭ ساياسي جۇيەنى نىعايتۋعا، ەكونوميكانى دامىتۋعا جانە وركەنيەتتى قوعام قۇرۋعا ىقپال ەتەتىنىنە سەنىم ءبىلدىردى.
“پرەزيدەنت – حالىقتىڭ بەلگىلى ءبىر مەرزىمگە، ءبىزدىڭ جاعدايىمىزدا جەتى جىلعا جالداعان مەنەدجەرى”، — دەپ تۇيىندەدى ول.
