Búgin Taldyqorǵan qalasyndaǵy Jetisý oblysynyń qylmystyq ister jónindegi mamandandyrylǵan aýdanaralyq sotynda Sherzat Bolattyń ólimine qatysty aldyn ala sot tyńdaýy ótti. Oǵan jábirlenýshi tarap, aiyptalýshylar jáne BAQ ókilderi qatysty. Shamamen bir saǵatqa sozylǵan tyńdaýdan keiin Dalanews.kz tilshisi marqumnyń otbasynyń advokaty Meiirman Shekeev pen ákesi Qarjaýbai Nurymovtan sot protsesi jaily pikirin surady.
Advokattyń aitýynsha, jábirlenýshilerdiń basty talaby – ádil úkim shyǵarý.
"Jábirlenýshi tarap tek ádil sotty talap etedi. Odan basqa eshteńe suramaidy. Endi bir úide eki qazanyń oryn alýy – ońai emes. Bári kúizeliste. Biz bolashaqta kúdiktilerdiń erte shartsyz jazaǵa aýysyp ketpeýi úshin taǵy bir talap qoiamyz. Ony kelesi sotta jariailaimyz", – dedi advokat.
Alaida Sherzattyń ákesi Qarjaýbai Nurymov sottyń ádil ótetinine kúmánmen qaraitynyn jetkizdi.
"Qazir qylmyskerlerdi sottaý emes aqtap alý protsesi júrip jatyr. Zań aqtap alǵysy kelse, bosatyp jiberedi. Eger solai bolǵan jaǵdaida men qarsy emespin. Sottyń ádil ótetine kózim jetpeidi", – dedi Qarjaýbai Nurymov.
Sot tyńdaýynda ne aityldy?
Sotta prokýror istiń mán-jaiy qalai órbigeni týraly baiandady.
Prokýrordyń aitýynsha, qaiǵyly jaǵdaidyń aldynda jastar arasyndaǵy janjal bastalyp ketken. Toqtaýbaev, Iliiasov jáne olarmen birge júrgen eki qyz – Nurbekova men Jaqsykeldi avtokólikpen "Qamajai" dúkeni jaqqa bet alǵan. Al Shynasyl sol sátte Euphoria kafesiniń aldynda turǵan Áshirbaevtyń basqarýyndaǵy kólikpen olardyń sońynan ilesken.
Osy ýaqytta marqum Sherzat Bolat kámeletke tolmaǵan dostary Seisenbai, Ahmet jáne Mahmet Aldiiardy dúken mańyna kómekke shaqyrǵan. Olar shaqyrtý boiynsha túngi 00:34 shamasynda jaldamaly kólikpen kelip jetken. Nátijesinde birneshe adam bir jerde jinalyp, jaǵdai ýshyǵa túsken.
Quraqbaevtyń aitýynsha, Shynasyl ádeii qylmys jasaýǵa bel býǵan.
"Shynasyl Bolatty kóre tura, janynda Nurymov, anasy jáne ájesi bolýyna qaramastan, olardyń kóz aldynda júrek tusyna qasaqana pyshaq suǵyp alǵan. Zardap shekken jasóspirim asfaltqa otyra ketken", – dedi prokýror.
Sóitip Belǵojaev Sherzattyń basynan teýip, bákiniń sabymen basyna birneshe ret soqqy jasaǵan.
“Al Iliiasov sol jerde jatqan joǵaryda kórsetilgen 16-kalibrli ańshylyq myltyqty jerden alyp, myltyqtyń sabymen Polattyń basyna bir márte soqqy jasaǵan. Alaida soqqy Bishembievanyń oń jaq qolyna tigen. Munymen shektelmei, Iliiasov óziniń áreketin jalǵastyryp ańshylyq myltyqtyń sabymen sol jerde otyrǵan Ǵaiypbaevtyń basyna birneshe ret soqqy jasaǵan”, - dedi prokýror.
Neshe adam aiyptalyp jatyr?
Kúdiktileriń jalpy sany – 9. Olar: Shynasyl Abzal Nurǵaliuly, Sákiev Ravil Magomedovich, Belǵajaev Shyńǵys Aidosuly, Áskentai Darhan Darhanuly, Oqtaýbaev Nurbol Muratbekuly, Iliiasov Nurqiias Tólepbekuly, Oqtaýbaev Azamat Maratbekuly, Qaliahmet Didar Erkinuly, Ysqaqov Dýman Qaidaruly.
Aýyr aiyp tek eki adamǵa taǵylǵan
Bul týraly advokat Meiirman Shekeev habarlady.
"Eki kúdiktige: Shynasyl Abzal men Sákeev Ravilge aiyp taǵylyp otyr. Qalǵan jeti kúdiktiniń isi “buzaqylyq” babymen qaralady. Memlekettik aiyptaýshynyń aitqany sol. Ol is materialdarymen úilesedi dep oilaimyz. Biz, jábirlenýshi tarap onymen kelispeimiz. Biraq ol memlekettik aiyptaý aktisi", deidi Shekeev.
Advokat Shekeevtiń aiyptaý aktisi jaily oiy
"Qarjaýbai aiyptaý aktin búgin ǵana estip otyr. Qarjaýbaidy tergeý aiaqtalǵan kezde is materialdarymen tanystyrmady. Sondyqtan onyń pikirin aita almaimyz. Advokattar bir nársemen kelispeimiz. Ony sotta aitamyz. Qazir aita almaimyz. Qalǵan aiyptaý aktimen kelisemiz", deidi advokat.
Aiyptalýshy tarap neni talap etti?
Aldyn ala sot otyrysynda sottalýshylar alqabiler sotyna qatysý quqyǵynan bas tartty. Zań talabyna sáikes isti bir sýdia qaraityn bolady.
Negizgi sot otyrysy qashan ótedi?
Sýdia basty sot otyrysyn 17 sáýirde saǵat 10:00-ge belgiledi. Odan keiingi sot otyrysy 18 sáýirde ótedi.
Sýdianyń qaýlysyna sáikes, sot otyrysy aptasyna eki ret, beisenbi jáne juma kúnderi ótedi.
Eske salaiyq, búgin Taldyqorǵanda Sherzat isi boiynsha aldyn ala sot tyńdaýy ótti.
“Sot otyrysyna qatysýshylardyń pikirlerin eskere otyryp, sot bul is boiynsha sot talqylaýyn ashyq rejimde ótkizý týraly sheshim qabyldady”, — dedi Joǵarǵy Sot.
Transliatsiia Joǵarǵy Sottyń YouTube arnasynda ótti.
Aita keteiik, buǵan deiin Joǵarǵy sot Sherzat Bolat isi boiynsha sot otyrysy nelikten Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵimaratynda ótetinin túsindirgen edi.
“Aiyp taǵylǵan toǵyz adam Taldyqorǵandaǵy tergeý izoliatorynda qamaýda otyr. Soǵan bailanysty sot otyrysy Jetisý oblysynda ótedi”, — dedi olar.
