بۇگىن تالدىقورعان قالاسىنداعى جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا شەرزات بولاتتىڭ ولىمىنە قاتىستى الدىن الا سوت تىڭداۋى ءوتتى. وعان جابىرلەنۋشى تاراپ، ايىپتالۋشىلار جانە ب ا ق وكىلدەرى قاتىستى. شامامەن ءبىر ساعاتقا سوزىلعان تىڭداۋدان كەيىن Dalanews.kz ءتىلشىسى مارقۇمنىڭ وتباسىنىڭ ادۆوكاتى مەيىرمان شەكەيەۆ پەن اكەسى قارجاۋباي نۇرىموۆتان سوت پروسەسى جايلى پىكىرىن سۇرادى.
ادۆوكاتتىڭ ايتۋىنشا، جابىرلەنۋشىلەردىڭ باستى تالابى – ءادىل ۇكىم شىعارۋ.
"جابىرلەنۋشى تاراپ تەك ءادىل سوتتى تالاپ ەتەدى. ودان باسقا ەشتەڭە سۇرامايدى. ەندى ءبىر ۇيدە ەكى قازانىڭ ورىن الۋى – وڭاي ەمەس. ءبارى كۇيزەلىستە. ءبىز بولاشاقتا كۇدىكتىلەردىڭ ەرتە شارتسىز جازاعا اۋىسىپ كەتپەۋى ءۇشىن تاعى ءبىر تالاپ قويامىز. ونى كەلەسى سوتتا جاريايلايمىز"، – دەدى ادۆوكات.
الايدا شەرزاتتىڭ اكەسى قارجاۋباي نۇرىموۆ سوتتىڭ ءادىل وتەتىنىنە كۇمانمەن قارايتىنىن جەتكىزدى.
"ءقازىر قىلمىسكەرلەردى سوتتاۋ ەمەس اقتاپ الۋ پروسەسى ءجۇرىپ جاتىر. زاڭ اقتاپ العىسى كەلسە، بوساتىپ جىبەرەدى. ەگەر سولاي بولعان جاعدايدا مەن قارسى ەمەسپىن. سوتتىڭ ءادىل وتەتىنە كوزىم جەتپەيدى"، – دەدى قارجاۋباي نۇرىموۆ.
سوت تىڭداۋىندا نە ايتىلدى؟
سوتتا پروكۋرور ءىستىڭ ءمان-جايى قالاي وربىگەنى تۋرالى باياندادى.
پروكۋروردىڭ ايتۋىنشا، قايعىلى جاعدايدىڭ الدىندا جاستار اراسىنداعى جانجال باستالىپ كەتكەن. توقتاۋبايەۆ، ءىلياسوۆ جانە ولارمەن بىرگە جۇرگەن ەكى قىز – نۇربەكوۆا مەن جاقسىكەلدى اۆتوكولىكپەن "قاماجاي" دۇكەنى جاققا بەت العان. ال شىناسىل سول ساتتە Euphoria كافەسىنىڭ الدىندا تۇرعان اشىربايەۆتىڭ باسقارۋىنداعى كولىكپەن ولاردىڭ سوڭىنان ىلەسكەن.
وسى ۋاقىتتا مارقۇم شەرزات بولات كامەلەتكە تولماعان دوستارى سەيسەنباي، احمەت جانە ماحمەت الدياردى دۇكەن ماڭىنا كومەككە شاقىرعان. ولار شاقىرتۋ بويىنشا تۇنگى 00:34 شاماسىندا جالدامالى كولىكپەن كەلىپ جەتكەن. ناتيجەسىندە بىرنەشە ادام ءبىر جەردە جينالىپ، جاعداي ۋشىعا تۇسكەن.
قۇراقبايەۆتىڭ ايتۋىنشا، شىناسىل ادەيى قىلمىس جاساۋعا بەل بۋعان.
"شىناسىل بولاتتى كورە تۇرا، جانىندا نۇرىموۆ، اناسى جانە اجەسى بولۋىنا قاراماستان، ولاردىڭ كوز الدىندا جۇرەك تۇسىنا قاساقانا پىشاق سۇعىپ العان. زارداپ شەككەن ءجاسوسپىرىم اسفالتقا وتىرا كەتكەن"، – دەدى پروكۋرور.
ءسويتىپ بەلعوجايەۆ شەرزاتتىڭ باسىنان تەۋىپ، باكىنىڭ سابىمەن باسىنا بىرنەشە رەت سوققى جاساعان.
“ال ءىلياسوۆ سول جەردە جاتقان جوعارىدا كورسەتىلگەن 16-كاليبرلى اڭشىلىق مىلتىقتى جەردەن الىپ، مىلتىقتىڭ سابىمەن پولاتتىڭ باسىنا ءبىر مارتە سوققى جاساعان. الايدا سوققى بيشەمبييەۆانىڭ وڭ جاق قولىنا تيگەن. مۇنىمەن شەكتەلمەي، ءىلياسوۆ ءوزىنىڭ ارەكەتىن جالعاستىرىپ اڭشىلىق مىلتىقتىڭ سابىمەن سول جەردە وتىرعان عايىپبايەۆتىڭ باسىنا بىرنەشە رەت سوققى جاساعان”، - دەدى پروكۋرور.
نەشە ادام ايىپتالىپ جاتىر؟
كۇدىكتىلەرىڭ جالپى سانى – 9. ولار: شىناسىل ابزال نۇرعالي ۇلى، ساكييەۆ راۆيل ماگومەدوۆيچ، بەلعاجايەۆ شىڭعىس ايدوس ۇلى، اسكەنتاي دارحان دارحان ۇلى، وقتاۋبايەۆ نۇربول مۇراتبەك ۇلى، ءىلياسوۆ نۇرقياس تولەپبەك ۇلى، وقتاۋبايەۆ ازامات ماراتبەك ۇلى، قالياحمەت ديدار ەركىن ۇلى، ىسقاقوۆ دۋمان قايدار ۇلى.
اۋىر ايىپ تەك ەكى ادامعا تاعىلعان
بۇل تۋرالى ادۆوكات مەيىرمان شەكەيەۆ حابارلادى.
"ەكى كۇدىكتىگە: شىناسىل ابزال مەن ساكەيەۆ راۆيلگە ايىپ تاعىلىپ وتىر. قالعان جەتى كۇدىكتىنىڭ ءىسى “بۇزاقىلىق” بابىمەن قارالادى. مەملەكەتتىك ايىپتاۋشىنىڭ ايتقانى سول. ول ءىس ماتەريالدارىمەن ۇيلەسەدى دەپ ويلايمىز. ءبىز، جابىرلەنۋشى تاراپ ونىمەن كەلىسپەيمىز. ءبىراق ول مەملەكەتتىك ايىپتاۋ اكتىسى"، دەيدى شەكەيەۆ.
ادۆوكات شەكەيەۆتىڭ ايىپتاۋ اكتىسى جايلى ويى
"قارجاۋباي ايىپتاۋ اكتىن بۇگىن عانا ەستىپ وتىر. قارجاۋبايدى تەرگەۋ اياقتالعان كەزدە ءىس ماتەريالدارىمەن تانىستىرمادى. سوندىقتان ونىڭ پىكىرىن ايتا المايمىز. ادۆوكاتتار ءبىر نارسەمەن كەلىسپەيمىز. ونى سوتتا ايتامىز. ءقازىر ايتا المايمىز. قالعان ايىپتاۋ اكتىمەن كەلىسەمىز"، دەيدى ادۆوكات.
ايىپتالۋشى تاراپ نەنى تالاپ ەتتى؟
الدىن الا سوت وتىرىسىندا سوتتالۋشىلار القابيلەر سوتىنا قاتىسۋ قۇقىعىنان باس تارتتى. زاڭ تالابىنا سايكەس ءىستى ءبىر سۋديا قارايتىن بولادى.
نەگىزگى سوت وتىرىسى قاشان وتەدى؟
سۋديا باستى سوت وتىرىسىن 17 ساۋىردە ساعات 10:00-گە بەلگىلەدى. ودان كەيىنگى سوت وتىرىسى 18 ساۋىردە وتەدى.
سۋديانىڭ قاۋلىسىنا سايكەس، سوت وتىرىسى اپتاسىنا ەكى رەت، بەيسەنبى جانە جۇما كۇندەرى وتەدى.
ەسكە سالايىق، بۇگىن تالدىقورعاندا شەرزات ءىسى بويىنشا الدىن الا سوت تىڭداۋى ءوتتى.
“سوت وتىرىسىنا قاتىسۋشىلاردىڭ پىكىرلەرىن ەسكەرە وتىرىپ، سوت بۇل ءىس بويىنشا سوت تالقىلاۋىن اشىق رەجيمدە وتكىزۋ تۋرالى شەشىم قابىلدادى”، — دەدى جوعارعى سوت.
ترانسلياسيا جوعارعى سوتتىڭ YouTube ارناسىندا ءوتتى.
ايتا كەتەيىك، بۇعان دەيىن جوعارعى سوت شەرزات بولات ءىسى بويىنشا سوت وتىرىسى نەلىكتەن جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ عيماراتىندا وتەتىنىن تۇسىندىرگەن ەدى.
“ايىپ تاعىلعان توعىز ادام تالدىقورعانداعى تەرگەۋ يزولياتورىندا قاماۋدا وتىر. سوعان بايلانىستى سوت وتىرىسى جەتىسۋ وبلىسىندا وتەدى”، — دەدى ولار.
