Ábdibaqyt Maqulbaev: «Kentaý halqy arasynda ózara qurmet pen syilastyq dástúr qalyptasqan»
Ortalyq Yntymaq alańynan bastalǵan jiynda qala turǵyndary men qonaqtary qalada óndiriletin ónimder kórmesin tamashalady. Sondai-aq, kiiz úilerde ótken ulttyq salt-dástúrlerge arnalǵan sharalar men ulttyq sport túrlerinen jarystardy kórdi. Sýret salý baiqaýynda kórkem sýret mektebiniń oqýshylary qalanyń kórikti jerlerin beineledi.
Qala ákimi Ábdibaqyt Maqulbaev pen QR Japoniianyń Tótenshe jáne ókiletti elshisi Itiro Kavabata qala kúnine orai Iasaýi dańǵylyndaǵy ǵimarattar meketiniń beinesi keskindelip jasalǵan tortty kesip, dám tatty. Munan soń, dámdi tort qala turǵyndaryna taratyldy.
Al, Sh.Qaldaiaqov atyndaǵy mádeniet saraiynyń tuǵyrynda ótken «Keleshegi kemel – Kentaý» atty saltanatty jiynda sóz alǵan qala basshysy kópshilikti merekemen quttyqtady.
– Kentaý – halqynyń júregi keń. Munda birlik, ózara qurmet pen syilastyq dástúrge ainalǵan. Onyń aiǵaǵy – qala turǵyndarynyń búgingi jarasymdy tynys-tirshiligi jáne ortaq shańyraqta tatý-tátti ómir súrip, ózderiniń parasat-parqynyń joǵarylyǵyn kórsetýi. Bul - kentaýlyqtardyń burynnan qalyptasqan asa qundy bailyǵy, boitumary der edim. Qala basshysy retinde osyndai órkenietke jol salǵan aǵa býyn ókilderine, olardyń izin jalǵastyrýshy búgingi urpaqqa aitar alǵysym sheksiz, –dedi.
Sondai-aq, qalanyń áleýmettik-ekonomikalyq, qoǵamdyq-saiasi damýyna qosqan eleýli úlesi jáne eńbektegi joǵary jetistikteri úshin birqatar qala janashyrlary «Kentaý qalasynyń Qurmetti azamaty» ataǵyn aldy. Sonymen qatar, qaltqysyz qyzmetimen qala damýyna eńbek sińirgen jandardyń sýretteri qalanyń qurmet taqtasyna ilinetin boldy.
Is-sharada qalalyq máslihat hatshysy Talǵat Balabiev merekelik lebizin bildirdi. Qazaqstan Respýblikasyndaǵy Japoniianyń Tótenshe jáne ókiletti elshisi Itiro Kavabata da quttyqtaýyn joldady.
Merekelik is-sharany aktrisa Juldyzai Dúisenbieva men qalamyzdyń jas ónerpazy Baqyt Myńbai júrgizdi. Ánshi, kompozitor, QR Eńbek sińirgen ártisi Marat Omarov ásem ánder oryndap kópshiliktiń ystyq yqylasyna bólendi. Qala ónerpazdary da Kentaý qalasy jaily ánder shyrqady.
Qazaqstan Respýblikasyndaǵy Japoniianyń Tótenshe jáne ókiletti elshisi Itiro Kavabata Kentaý transformator zaýytynda, qalalyq murajaida boldy. Sondai-aq, japon jaýyngerlerine arnalǵan eskertkishke gúl qoiý rásimine qatysty.
Qala turǵyndary men qonaqtary keshkisin Qazaqstan óner juldyzdarynyń qatysýymen ótken «Kentaýym – gúl baǵym» atty merekelik gala kontsert pen ot shashýdy tamashalady.
