QR Parlamenti Májilisiniń VIII shaqyrylym depýtaty Janarbek Áshimjan Abaı Qunanbaıulynyń 180 jyldyq mereıtoıyna oraı Semeıden 170 shaqyrym qashyqtyqtaǵy kıeli Jıdebaıǵa baryp, uly oıshyl Abaıdyń rýhyna taǵzym etti,- dep habarlaıdy Dalanews.kz
Depýtattyń aıtýynsha, bul sapardyń maqsaty — eldiń erteńi men Otan amandyǵy úshin tilek tileý jáne qazaqtyń uly tulǵalaryna qurmet kórsetý.
«Jaratqan Iemiz tilegimizdi qabyl qylǵaı! Qazirgi kúnderi Alashtyń aty shyqqan azamattarynyń bári Semeıge, kıeli Jıdebaıǵa aǵylyp kelip jatyr», — dedi ol.
1 tamyzdan bastap Abaıdyń 180 jyldyǵyna arnalǵan túrli mádenı jáne rýhanı is-sharalar Abaı oblysynyń ortalyǵy Semeıde jáne ózge óńirlerde ótip jatyr. Prezıdent Qasym-Jomart Toqaev jyl basynda Abaıdyń mereıtoıyn laıyqty deńgeıde atap ótý qajettigin jáne onyń rýhanı muralary qazaq qoǵamynyń ómir saltynda baǵdarsham bolýy tıis ekenin atap ótken edi.
Janarbek Áshimjan Abaıdyń shyǵarmashylyq murasy búginde qaıta jańǵyryp, kitaptar men jınaqtar basylyp jatqanyn aıtty. Sondaı-aq ol aqynnyń altynshy qara sózindegi birlik týraly oıyna toqtalyp, «Abaı aıtqan aqylǵa birlik — eldikke, ulttyq múddege bastaıdy» dedi.
Halyq qalaýlysy mereıtoı eldiń rýhanı qýatyn arttyryp, jastardyń Abaı murasyna bet burýyna yqpal etedi degen senim bildirdi.
