Abai ýniversitetinde halyqaralyq jas aqyndar aitysy ótti
Abai atyndaǵy QazUPÝ-dyń uiymdastyrýymen, Almaty qalasy máslihatynyń depýtaty, belgili kásipker, Dýlat Tastekeevtiń demeýshiligimen ótken bul alaman aitys biyl Abai atyndaǵy Qazaq ulttyq ýniversitetiniń 95 jyldyǵyna arnaldy. Osymen jetinshi márte shymyldyǵyn túrgen jyr dodasyna respýblika aimaqtarynan kelgen oi-órisi keń, tolǵaýy tereń azýly aqyndarmen qatar, álemniń 4 memleketinen, atap aitqanda Ózbekstan, Qyrǵyzstan, Qytai jáne Monǵoliianyń iriktelgen júirikteri men sóz ónerin pir tutatyn qyryqqa jýyq daryndy jastar qatysty.
Dúbirli dodany ýniversitet basshysy Darhan Bilálov ashyp, barlyq qatysýshylarǵa sáttilik tiledi. Ol óz sózinde aityskerlerdiń oraq tildiligi, ot aýyzdylyǵy, sóz kórkemdigi, bilimdiligi, alǵyrlyǵy, tapqyrlyǵy, taqyrypty ashý sheberligimen birge, Abai ýniversitetiniń 95 jyldyq tarihy, shyǵarmashylyq ómiri men ǵylymi jetistikteri, sondai-aq jastardy óz elin súiýde, onyń órkendeýine óz úlesin qosýda jáne ulttyq sana-sezimdi qalyptastyrýda jetken tabystary týraly keńinen kósilip jyrlaý kerektigine toqtaldy. Shara barysynda sóilegen QR Eńbek sińirgen qairatkeri, Halyqaralyq «Aitys aqyndary men jyrshy-termeshiler» odaǵynyń Basqarama tóraǵasy, «Parasat» jáne «Qurmet» ordeniniń iegeri Júrsin Erman jyl saiyn ótkizilip kele jatqan bul jastar aitysynyń mańyzdylyǵyna toqtalyp, bul óner dodasynyń jas urpaqty tárbieleýdegi orny óte úlken ekendign tilge tiek etti, jas júirikterge óz batasyn berdi.
Alaman dodaǵa túsetin jas aqyndardyń aitysyn aqyn Júrsin Ermannan basqa, QR Parlamentiniń májilis depýtaty, aqyn Rinat Zaitov, «Alash» halyqaralyq ádebi sailyǵynyń laýreaty, belgili aqyn Serik Qaliev, filologiia ǵylymdarynyń doktory, professor Baltabai Ábdiǵazyuly, Ulytaý oblysy Mádeniet, tilderdi damytý jáne arhiv isi basqarmasynyń basshysy, aitysker aqyn Ánýar Omar, aitysker aqyn, QR Mádeniet salasynyń úzdigi qatarly óner maitalmandary qazylyq jasady.
Is-shara barysynda QR Ǵylym jáne joǵary bilim ministri Saiasat Nurbektiń «Halqymyzdyń san ǵasyrdan kele jatqan qasietti aitys ónerine degen qurmeti airyqsha. Bul – keshegi Súiinbai men Jambyl, Birjan men Sara, Kempirbai men Shóje babalarymyzdan qalǵan asyl óner. Ulttyq bolmysymyzdy, qazaqi qundylyǵymyzdy dáripteitin aitys óneri táýelsiz urpaqtyń ulttyq qazynasy dep bilemin. Súiinbai babamyz atyndaǵy jyr dodasynyń dástúrli túrde uiymdastyrylýy, jastardyń boiyndaǵy aqyndyq daryndy damytyp, sýyrypsalma qabletin shyńdaýǵa, aqyndyq mekteptiń qalyptasýyna negiz bolatyn, qazaq rýhaniiatyna qosylatyn úlken mura bolatyny sózsiz» dep aqyndarǵa shalqar shabyt tilegen quttyqtaý haty oqyldy.
Aitys eki kezeńnen turdy. Aqtyq kezeńge 18 aitysker joldama aldy. Sóitip jyr jekpe-jeginde jer apshysyn qýyrǵan kil júirikterdiń ónerin kórermen jurt eki kún boiy tamsana tamashalady. Bári de qazaq joǵary oqý ornynyń qara shańyraǵy — Abai atyndaǵy QazUPÝ-dyń ótken joly men ulttyq pedagog mamandardy tárbieleýdegi eren isterin termelep, taram-taram tarihyna tereń boilai bildi, ýniversitet ustazdarynyń ulaǵatty eńbekterin búgingi qoǵammen bailanystyryp, eldik múdde men bekem birliktiń baiandy bolýyn tiledi.
Qazylar alqasynyń sheshimimen «Meniń pirim – Súiinbai» dástúrli VII halyqaralyq jas aqyndar aitysynyń Bas júldesin Kókshetaýdan kelgen Nurmahan Jaqyp ielendi. I-shi oryn Qazaq ulttyq óner ýniversitetiniń stýdenti Aiym Asylbekqyzyna buiyrsa, II-shi oryndy Qyrǵyzstannan kelgen Ulan Toqtosynov pen T.Júrgenov atyndaǵy Óner akademiiasynyń stýdenti Erdáýlet Sardar enshiledi. Al, III-shi oryndy Batyrjan Kádirbai, Jambyl Baqytáli jáne Qýandyq Kejebekuly ózara bólisti. Jalpy, aitysqa qatysýshy barlyq aqynǵa arnaiy júldeler men aqshalai syilyqtar tabystaldy.
