Búgin Semei qalasynyń ortalyq alańynda Qasym Qaisenov atyndaǵy №68303 áskeri bóliminiń jeke quramyna jańa arnaiy tehnikalardyń kiltin tapsyrý rásimi ótti. Is-sharaǵa oblys ákimi Berik Ýáli, Tótenshe jaǵdailar ministri Shyńǵys Árinov qatysty, dep habarlaidy Dalanews.kz
Oblys qurylǵaly beri óńirge 28 órt sóndirý tehnikasy men 24 injenerli tehnika berilgen. Búgin qutqarý qyzmetiniń qajettilikterine arnalǵan 23 tehnikanyń kilti júrgizýshilerge tapsyryldy. Olardyń qatarynda joǵary ótimdi júk kólikteri, arnaiy qutqarý mashinalary men «Trekol» kóligi bar.
Saltanatty rásimde sóz sóilegen oblys ákimi Berik Ýáli Tótenshe jaǵdailar ministrligine alǵys aityp, jańa tehnikalardyń kelýi óńir turǵyndarynyń qaýipsizdigi úshin jasalǵan mańyzdy qadam ekenin atap ótti.
«Bizdiń aimaq – ormandy-dalaly, órt qaýpi joǵary óńir. Sondyqtan bul salada eńbek etip júrgen azamattarǵa artylar júk te, senim de mol. Olar antyna adal, sertine berik, eldiń amandyǵyn bárinen joǵary qoiatyn azamattar. Sol er júrek mamandarǵa da shynaiy alǵysymdy bildiremin. Sondai-aq, oqys jaǵdailarǵa únemi daiyn bolý maqsatynda, qajetti qaýipsizdik tehnikalary kezeń-kezeńimen tolyqtyrý turaqty nazarda bolatynyn da basa aitqym keledi», - dedi aimaq basshysy.
Kilt tapsyrý rásiminde sóz alǵan Tótenshe jaǵdailar ministri Shyńǵys Árinov jańa tehnikanyń qutqarýshylar jumysyna úlken serpin beretinine senim bildirdi.
Shara sońynda oblys ákimi Tótenshe jaǵdailar ministrimen birge Qutqarýshylar alleiasyna shyrshanyń jas kóshetterin otyrǵyzdy.
