Besqaraǵaı aýdany Nurlybek Baımuratov atyndaǵy orta mekteptiń 10-synyp oqýshysy Erasyl Beısengazınov ekologıalyq taza portatıvti generator qurastyrdy, dep habarlaıdy Dalanews.kz
Jas ónertapqyshtyń aıtýynsha, qurylǵyny paıdalaný úshin ózen nemese úlken sý qoımasy qajet emes, shaǵyn konteınerdegi sý jetkilikti.
Generatordyń jumys prınsıpi qarapaıym: ydystaǵy sý shaǵyn sorǵy arqyly dóńgelek qalaqtaryna beriledi. Dóńgelek aınalǵan kezde generator iske qosylyp, elektr energıasyn óndiredi. Nátıjesinde turmystyq qajettilikke jaramdy qýat alynady.
«Bul generatordyń basty artyqshylyǵy – aýa raıyna táýelsizdigi. Kún nemese jel elektr stansalary sıaqty tabıǵı jaǵdaıdy kútýdiń qajeti joq. Qurylǵyny kez kelgen jerde ornatyp, qoldanýǵa bolady. Barlyq materıal ekologıalyq taza ári densaýlyqqa zıany joq», – deıdi ónertapqysh oqýshy.
Jobany júzege asyrý barysynda Erasyl qolda bar materıaldardy paıdalanǵan. Dóńgelek eski gramplastınkalardan jasalsa, qalaqshalary plasık bótelke qaqpaqtarynan qurastyrylǵan. Negizgi 12 vólttik generator eski prınterden alynyp, sý sorǵysy retinde oıynshyq sý burqaq qozǵaltqyshy qoldanylǵan. Jaryq kózi retinde jaryqdıodty shamdar ornatyldy.
Aldaǵy ýaqytta oqýshy qurylǵyny jetildirip, qýatyn arttyrýdy josparlap otyr. Sondaı-aq generatordy turmystyq tehnıkalardy qosýǵa beıimdeýdi maqsat etedi.
Bul bastama jas ónertapqyshtyń izdenimpazdyǵy men ınjenerlik qabiletin kórsetip qana qoımaı, bolashaqta energıa únemdeýdiń tıimdi joldaryn damytýǵa úles qosýy múmkin.
Jetekshisi: fızıka páni muǵalimi Meıramgalı Jeksenaev
