Astanada Prezident Qasym-Jomart Toqaevtyń shaqyrýymen Qazaqstanǵa alǵash ret resmi saparmen kelgen Chernogoriia prezidenti Iakov Milatovichpen kelissózder ótti, dep habarlaidy Dala News.
Táýelsizdik saraiynda ótken resmi qarsy alý rásiminen keiin memleket basshylary áýeli shaǵyn, keiin keńeitilgen quramda kelissóz júrgizdi. Qasym-Jomart Toqaev bul sapardyń tarihi mańyzǵa ie ekenin atap ótti.
– Prezident myrza, Qazaqstanǵa resmi saparmen kelgenińizge óte qýanyshtymyn. Chernogoriia memleketi basshysynyń alǵashqy tarihi saparyna erekshe mán berip otyrmyz. Sondai-aq muny elimiz úshin óte mańyzdy ýaqiǵa retinde qarastyramyz. Kelissózderimizdiń nátijesi ekijaqty qarym-qatynasqa tyń serpin beretinine senimim kámil. Chernogoriiany halqymyz jaqsy biledi. Kóptegen azamatymyz jyl saiyn Sizdiń elde demalyp, jaqsy ásermen oralady. Oraily sátti paidalana otyryp, elińizdiń táýelsizdik alǵanyna 20 jyl tolýymen quttyqtaimyn. Osy jyldarda biz jaqsy qarym-qatynas ornattyq. Ózara yntymaqtastyǵymyzdyń mazmunyn baiyta túsý kerek dep oilaimyn. Oǵan eshqandai kedergi joq. Sizdiń iskerlik delegatsiiańyzdyń quramy óte salmaqty. Bul ekonomikalyq jáne iskerlik bailanystardyń aýqymyn arttyra túsýge nietti ekenińizdi kórsetedi, – dedi Memleket basshysy.
Óz kezeginde Iakov Milatovich Qazaqstanǵa jasaǵan alǵashqy sapary eki el arasyndaǵy yntymaqtastyqtyń jańa kezeńin bastaitynyna senim bildirdi.
– Qurmetti Prezident! Eń aldymen Qazaqstanǵa shaqyrǵanyńyz úshin alǵys aitamyn. Ózińiz atap ótkendei, bul – Chernogoriia Prezidentiniń Qazaqstanǵa alǵashqy resmi sapary. Búgin biz ekijaqty yntymaqtastyqtyń kókjiegin keńeite túsemiz dep senemin. Bul sapar bailanystarymyzdyń joǵary deńgeige kóterilgenin kórsetedi. Men munda dostas eldiń ókili retinde keldim. Chernogoriianyń iskerlik orta ókilderi de osynda. Eki eldiń saýda palatalary biznes forým ótkizedi, birqatar memorandýmǵa qol qoiylady. Chernogoriia Qazaqstan azamattary úshin tanymal baǵyttardyń biri ekenin bilemiz. Osy taraptaǵy bailanystarymyzdy kúsheite túskimiz keledi. Sizben saiasi yntymaqtastyqty ǵana emes, ekonomikalyq seriktestikti keńeitý múmkindikterin de talqylaimyz, – dedi ol.
Keńeitilgen quramdaǵy kelissózder barysynda saiasi, saýda-ekonomikalyq jáne mádeni-gýmanitarlyq yntymaqtastyq máseleleri talqylandy.
– Prezident myrza, Siz reformalardy ilgeriletip, Eýropa Odaǵy músheligine úmitker sanalatyn Chernogoriianyń pozitsiiasyn nyǵaitýda mańyzdy ról atqaryp kelesiz. Osy ulttyq strategiialyq maqsatqa jetý jolynda tabys tileimiz, – dedi Qasym-Jomart Toqaev.
Prezident Qazaqstan naryǵyna shyǵýǵa múddeli chernogoriialyq kompaniialarǵa qolaily jaǵdai jasaýǵa daiyn ekenin málimdedi.
– Qazaqstan naryǵyna kirgisi keletin chernogoriialyq kompaniialardy qýana qarsy alamyz. Kásipkerlerińizge qolaily jaǵdai jasaýǵa daiynbyz, – dedi ol.
Iakov Milatovich Qazaqstan men Chernogoriia arasyndaǵy diplomatiialyq qatynastardyń ornaǵanyna 20 jyl tolýyna toqtaldy.
– Bul sapar saiasi turǵydan eki el arasyndaǵy senim deńgeii joǵary ekenin baiqatady. Onyń iskerlik bóligine jaýapty Ekonomikalyq palata da sapardyń mazmundy ótýine múddeli. Saýda palatalary arasynda qol qoiylatyn túsinistik týraly memorandým tyǵyz ekonomikalyq yqpaldastyqqa tyń serpin beredi dep sanaimyn, – dedi Chernogoriia prezidenti.
Onyń aitýynsha, Chernogoriia 2028 jyly Eýropa Odaǵyna tolyqqandy múshe bolýǵa úmittenedi.
Kelissózder barysynda taraptar saýda kólemin arttyrý, kólik-logistika, aýyl sharýashylyǵy, tsifrlandyrý, týrizm, ǵylym jáne joǵary bilim salalaryndaǵy yntymaqtastyqty keńeitý máselelerin qarastyrdy.
Sondai-aq Qasym-Jomart Toqaev Chernogoriia Ulttyq kitaphanasy janynan Abai ortalyǵyn ashýǵa qoldaý kórsetkeni úshin Iakov Milatovichke alǵys bildirdi.
