Halyqtyń basty bailyǵy – densaýlyq. Osy oraida qoljetimdi ári sapaly meditsinalyq kómekti damytý memleket úshin mańyzdy basymdyqtardyń biri. Bul baǵytta Aqsýat aýdanynda júieli ári nátijeli jumystar atqarylýda, dep habarlaidy Dalanews.kz.
«Aýyldyq densaýlyq saqtaýdy jańǵyrtý» ulttyq jobasy aiasynda aýdan aýmaǵynda birqatar jańa meditsinalyq nysandar paidalanýǵa berildi. Atap aitqanda, Úshtóbe jáne Ekpin aýyldarynda dárigerlik emhanalar, Kindikti aýylynda feldsherlik-akýsherlik pýnkt, sondai-aq Qyzyljuldyz, Kóktúbek, Sulýtal, Ainabastaý eldi mekenderinde meditsinalyq pýnktter salyndy. Atalǵan nysandar 16 jeltoqsan – Qazaqstan Respýblikasynyń Táýelsizdik kúni qarsańynda el igiligine tapsyryldy.
Jańa meditsinalyq mekemeler zamanaýi talaptarǵa sai sońǵy úlgidegi meditsinalyq qural-jabdyqtarmen tolyqtai qamtyldy. Máselen, Úshtóbe aýylyndaǵy dárigerlik emhanaǵa diagnostikalyq, emdik jáne fizioterapiialyq baǵyttaǵy ozyq meditsinalyq qurylǵylar ornatyldy. Olardyń qatarynda defibrilliator-monitor, infýziialyq jáne shpritstik nasostar, fetaldyq monitor, beineqolposkop, fizioterapiialyq apparattar, kompiýterlik spirometr, nebýlaizer, bakteritsidtik sáýlelendirgishter, fýnktsionaldy meditsinalyq kerýetter, zerthanalyq jáne reabilitatsiialyq quraldar, sondai-aq tsifrlyq jáne kompiýterlik tehnika bar.
Nysandardyń ashylý saltanatyna aýdan basshylyǵy, meditsina salasynyń qyzmetkerleri jáne aýyl turǵyndary qatysty. Jiyn barysynda turǵyndar kópten kútken áleýmettik nysandardyń iske qosylýy alǵashqy meditsinalyq kómektiń qoljetimdiligin arttyryp, aýyl meditsinasyn jańa sapalyq deńgeige kóterýge múmkindik beretinin atap ótti.
Sonymen qatar, jalpy sany 9 meditsinalyq nysannyń ishinde taǵy 2 meditsinalyq pýnkt 16 jeltoqsannan keiin kezeń-kezeńimen paidalanýǵa beriletin bolady.
