حالىقتىڭ باستى بايلىعى – دەنساۋلىق. وسى ورايدا قولجەتىمدى ءارى ساپالى مەديسينالىق كومەكتى دامىتۋ مەملەكەت ءۇشىن ماڭىزدى باسىمدىقتاردىڭ ءبىرى. بۇل باعىتتا اقسۋات اۋدانىندا جۇيەلى ءارى ناتيجەلى جۇمىستار اتقارىلۋدا، دەپ حابارلايدى Dalanews.kz.
«اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا اۋدان اۋماعىندا ءبىرقاتار جاڭا مەديسينالىق نىساندار پايدالانۋعا بەرىلدى. اتاپ ايتقاندا، ۇشتوبە جانە ەكپىن اۋىلدارىندا دارىگەرلىك ەمحانالار، كىندىكتى اۋىلىندا فەلدشەرلىك-اكۋشەرلىك پۋنكت، سونداي-اق قىزىلجۇلدىز، كوكتۇبەك، سۇلۋتال، ايناباستاۋ ەلدى مەكەندەرىندە مەديسينالىق پۋنكتتەر سالىندى. اتالعان نىساندار 16 جەلتوقسان – قازاقستان رەسپۋبليكاسىنىڭ تاۋەلسىزدىك كۇنى قارساڭىندا ەل يگىلىگىنە تاپسىرىلدى.
جاڭا مەديسينالىق مەكەمەلەر زاماناۋي تالاپتارعا ساي سوڭعى ۇلگىدەگى مەديسينالىق قۇرال-جابدىقتارمەن تولىقتاي قامتىلدى. ماسەلەن، ۇشتوبە اۋىلىنداعى دارىگەرلىك ەمحاناعا دياگنوستيكالىق، ەمدىك جانە فيزيوتەراپيالىق باعىتتاعى وزىق مەديسينالىق قۇرىلعىلار ورناتىلدى. ولاردىڭ قاتارىندا دەفيبريللياتور-مونيتور، ينفۋزيالىق جانە شپريستىك ناسوستار، فەتالدىق مونيتور، بەينەقولپوسكوپ، فيزيوتەراپيالىق اپپاراتتار، كومپيۋتەرلىك سپيرومەتر، نەبۋلايزەر، باكتەريسيدتىك ساۋلەلەندىرگىشتەر، فۋنكسيونالدى مەديسينالىق كەرۋەتتەر، زەرتحانالىق جانە رەابيليتاسيالىق قۇرالدار، سونداي-اق سيفرلىق جانە كومپيۋتەرلىك تەحنيكا بار.
نىسانداردىڭ اشىلۋ سالتاناتىنا اۋدان باسشىلىعى، مەديسينا سالاسىنىڭ قىزمەتكەرلەرى جانە اۋىل تۇرعىندارى قاتىستى. جيىن بارىسىندا تۇرعىندار كوپتەن كۇتكەن الەۋمەتتىك نىسانداردىڭ ىسكە قوسىلۋى العاشقى مەديسينالىق كومەكتىڭ قولجەتىمدىلىگىن ارتتىرىپ، اۋىل مەديسيناسىن جاڭا ساپالىق دەڭگەيگە كوتەرۋگە مۇمكىندىك بەرەتىنىن اتاپ ءوتتى.
سونىمەن قاتار، جالپى سانى 9 مەديسينالىق نىساننىڭ ىشىندە تاعى 2 مەديسينالىق پۋنكت 16 جەلتوقساننان كەيىن كەزەڭ-كەزەڭىمەن پايدالانۋعا بەرىلەتىن بولادى.
