Petropavl qalasynda jedel járdem brigadasy qurmanyń súiegine qaqalyp, tunshyǵa bastaǵan zeinetkerdiń ómirin saqtap qaldy, dep habarlaidy Dalanews.kz.
Oblystyq jedel meditsinalyq járdem ortalyǵynyń baspasóz qyzmetiniń málimetinshe, 103 pýltine 90 jastaǵy áieldiń qaqalyp, tynysy tarylyp jatqany týraly qońyraý túsken.
Dárigerler jetkenge deiin qart áieldiń denesi kógerip ketken. Keiin jedel járdem ortalyǵynyń ókilderi onyń prekoma jaǵdaiynda bolǵanyn túsindirdi.
«Naýqas es-tússiz kúide boldy, dem alýǵa árekettengenimen, ózdiginen tynys ala almady. Tynys alý joldarynyń ótkizgishtigi buzylǵan. Brigada halyqaralyq ACLS standarttaryna sáikes shuǵyl meditsinalyq kómek kórsete bastady», - dep habarlady óńirlik jedel meditsinalyq járdem ortalyǵy ókilderi.
Feldsherler birqatar meditsinalyq manipýliatsiia júrgizip, nátijesinde áieldiń tynys alý joldarynan súiegi bar qurmany alyp shyqqan.
Tynysy qalpyna kelgennen keiin zeinetker qalalyq aýrýhananyń jansaqtaý bólimine jatqyzyldy.
